Qazaqstan men Túrkııanyń saýda aınalymyn 15 mlrd dollarǵa jetkizemiz – Elshi

<p>ASTANA. KAZINFORM &ndash; Túrkııa Qazaqstannyń eń iri saýda seriktesteriniń bestigine kiredi jáne barlyq salada saýda-sattyqpen aınalysatyn jetekshi elderdiń biri sanalady. Bul týraly Túrkııa Respýblıkasynyń Qazaqstandaǵy Elshisi Mustafa Kapýdjý <a href="https://kaz.inform.kz/news/kazakstan-turkiya-intimaktastigi-aes-halikaralik-okigalar-elshmen-suhbat-7bb0e6/" target="_blank" rel="noopener">agenttikke bergen suhbatynda</a> aıtty.&nbsp;</p>

«Biz byltyr 2023 jyly aıtarlyqtaı iri, 9 mıllıard dollarǵa jýyq saýda aınalymyn jasadyq. Bul Túrkııadaǵy statıstıkalyq derekter málimeti. Bıylǵy alǵashqy alty aıda da osyndaı kórsetkish qaıtalandy. Byltyr eki eldiń prezıdenti Túrki Memleketteriniń Uıymy sammıtinde kelissózder júrgizgen bolatyn. Sonda jyldyq saýda aınalymyn 15 mlrd dollarǵa jetkizemiz degen maqsat qoıdyq jáne oǵan qol jetkize alatynymyzǵa senimdimin», - dedi M. Kapýdjý.

Elshiniń aıtýynsha, «Orta dáliz» jobasy boıynsha tek taýar aınalymy emes, qyzmet kórsetý salasynda da kórsetkishterdi arttyrý kózdelip otyr.

«Joǵaryda atap ótken 9 mıllıard dollarlyq aınalym tek taýar aınalymyna qatysty. Al qyzmet kórsetý salasyndaǵy kórsetkishterge kóz tastasaq, bul salanyń odan da tıimdi tustaryn ańǵarýǵa bolady. Bul turǵyda logıstıka salasy týraly aıtýǵa bolady. Túrkııa «Orta dálizden» ótetin barlyq taýardyń sońǵy úsh jylda úsh ese óskenin kórip qýanyp otyr. Osy baǵytta Túrkııa áli de bolsa ınvestıtsııa quıýdy jalǵastyrady», - dedi spıker.

Sonymen birge Baký – Tbılısı – Kars temirjolynyń áleýeti artty. Bul logıstıkalyq qoldaý men transport júıesiniń damýy, ınvestıtsııalardyń ulǵaıýy arqyly alǵa qoıǵan saýda aınalymy maqsattaryna aıtarlyqtaı jaqyndaý bar. 

«Árıne, qolda bar múmkindikti, áleýetti tolyǵymen qamtydyq dep aıtý múmkin emes. Munyń da ózindik sebepteri bar. Qaýipsizdiktiń keıbir salalarynda oryn alǵan geosaıası tepe-teńdiktiń ózgerýine baılanysty elder arasynda qaýipsizdik pen senim máselesi týyndady, bul jahandyq saýdanyń negizgi kedergileriniń biri bolyp otyr. Túrkııa men Qazaqstan geografııalyq jaǵynan óte mańyzdy aımaqta ornalasqanyn aıtyp ótý kerek. Ózderińiz biletindeı, keıingi jyldary ekonomıkalyq qyzmettiń nazary Azııaǵa aýyp keledi. Búginde Orta Azııa saýda ortalyǵyna aınaldy, al Batys elderi – bul taýarlar úshin negizgi naryq kózi bolyp otyr. Osy sebepti eń aldymen logıstıkalyq ınvestıtsııalarǵa kóńil bólýimiz kerek. Bul básekelestik jaǵdaıynda biz de – Túrkııa men Qazaqstan Azııa men Eýropany bir-birine baılanystyratyn memleketter retinde bul artyqshylyqty kóbirek paıdalanýymyz qajet», - dedi M. Kapýdjý.