Qazaqstan men Túrkııa Transkaspıı dálizi arqyly taýar tasymalyn arttyrýǵa múddeli

ASTANA. QazAqparat – Qazaqstan men Túrkııa Transkaspıı halyqaralyq dálizi arqyly taýar tasymalyn arttyrýǵa nıetti. Muny elimizge resmı saparmen kelgen Túrkııanyń Syrtqy ister mınıstri Hakan Fıdanmen kezdeskennen keıin birlesken málimdeme jasaǵan QR Syrtqy ister mınıstri Murat Nurtileý aıtty, dep habarlaıdy QazAqparat tilshisi.

«Qazir álemdegi geosaıası jáne geoekonomıkalyq ahýal kúrdeli bolyp turǵanyn bilesizder. Osy oraıda, biz kólik-tranzıt salasyndaǵy múmkindikterdi ári qaraı arttyrýǵa basa nazar aýdardyq. Atap aıtqanda, Transkaspıı halyqaralyq kólik dáliziniń áleýetin tolyq paıdalaný arqyly tasymaldy ulǵaıtý qajet degen baılamǵa keldik. Buǵan qosa, tranzıttik baǵdarlardyń dıversıfıkatsııasy retinde Qazaqstan-Túrikmenstan-Iran- Túrkııa temir jolyn túrik tarapy paıdalaný múmkindigin ortaǵa saldyq», - dedi Murat Nurtileý.

Mınıstr atap ótkendeı, sonymen birge eki el áskerı jáne qorǵanys ónerkásibi salalarynda da yntymaqtastyqty nyǵaıtýǵa múddeli.

«Taǵy bir ózekti másele – ol áskerı jáne qorǵanys-ónerkásip salasyndaǵy yntymaqtastyq. Elimizdiń qaýipsizdigin qamtamasyz etý isinde bul baǵyttyń mańyzy óte zor», - dep toqtaldy Murat Nurtileý.

Sonymen qatar vedomstvo basshysy qarashada Túrkistan qalasynda ótetin Túrki memleketteriniń mereıtoılyq 10-shy sammıtine qatysý úshin Túrkııa Prezıdenti Rejep Taııp Erdoǵan keletinin atap ótti.

Buǵan qosa, bıyl 7 aıda Qazaqstan men Túrkııa arasyndaǵy saýda aınalymy 3,6 mldr dollarǵa jetti.