Qazaqstan men Túrkııa temir jol salasynda kelisimge qol qoıdy

ANKARA. QazAqparat - Ankarada keshe, 12 qyrkúıekte qazaqstan-túrkııalyq ınvestıtsııalyq forýmy sheńberinde «Qazaqstan temir joly» UK» AQ men «TCDD Tasimacilik A.S.» AQ arasynda strategııalyq yntymaqtastyq týraly kelisimge qol qoıyldy, dep habarlaıdy «Qazaqstan temir joly»UK» AQ baspasóz qyzmeti.

Temirjol kóligi salasyndaǵy, sonyń ishinde mashına qurastyrý isi boıynsha eki jaqty qatynasty nyǵaıtýǵa arnalǵan qujatqa «Qazaqstan temir joly» UK» AQ basqarma tóraǵasy Qanat Alpysbaev pen «TCDD Tasimacilik A.S.» AQ bas dırektory Veısı Kýrt qol qoıdy.

Kelisim arqyly Transkaspıılik halyqaralyq kólik dálizi sheńberinde QR men TR aýmaǵyndaǵy kóliktik-logıstıkalyq júıe men tranzıttik áleýetti damytý salasyndaǵy birlesken jumystar qarastyrylady.

«Bizdiń elder arasynda Baký-Tbılısı-Kars temir jol jelisi men Kaspııdegi porttyq ınfraqurylym transqurlyqtyq tasymaldyń ósý qarqynyna yqpal etetin mýltımodaldy Transkaspıılik dáliz quryldy. 2018 jyly byltyrǵyǵa qaraǵanda temir jol jáne avtomobıl joly arqyly tasymal ósimi tórt ese bolady dep kútilýde. 2020 jylǵa qaraı tasymal kólemin 5 mln tonnaǵa deıin jetkizý kózdelýde», - dedi Q. Alpysbaev.

Kelisim sheńberinde taraptar sonymen qatar Qazaqstanǵa jáne keri baǵytta, Qytaıdan Túrkııaǵa jáne keri baǵytta júretin júkter úshin «Qorǵas-Shyǵys qaqpasy» AEA-da shoǵyrlandyrý jáne dıstrıbýtsııalaý ortalyǵyn qurýǵa, konteınerlerge básekege qabiletti tarıftik sharttar qoıýǵa ýaǵdalasty.