Qazaqstan men Túrkııa qorǵanys yntymaqtastyǵyn tereńdetý joldaryn talqylady

ANKARA. QazAqparat – QR Qorǵanys mınıstri Rýslan Jaqsylyqov Ankarada Túrkııanyń Ulttyq qorǵanys mınıstri Hýlýsı Akarmen kezdesti, dep habarlaıdy QazAqparat «Anadolý» agenttigine silteme jasap.

Rýslan Jaqsylyqov Ankaraǵa Qazaqstan Prezıdenti Qasym-Jomart Toqaevtyń delegatsııasy quramynda keldi. Mártebeli meımannyń qurmetine Túrkııanyń qorǵanys vedomstvosy ǵımaratynyń janynda qurmetti qaraýyl sapqa turdy.

Mınıstrler baýyrlas eki memlekettiń qorǵanys yntymaqtastyǵyn tereńdetý joldaryn, sondaı-aq óńirlik qaýipsizdik máselelerin talqylady. Qorǵanys vedomstvolarynyń basshylary Túrkııa men Qazaqstan halyqtaryn baılanystyratyn tarıhı tustardyń bar ekenin atap ótti.

Túrkııa mınıstri Ankara men Nur-Sultan arasyndaǵy strategııalyq seriktestik týraly kelisimdi ekijaqty baılanystardy keńeıtýdegi mańyzdy kezeń dep atady. Akar Túrkııa-Qazaqstan qorǵanys baılanystaryn, onyń ishinde birlesken áskerı oqý-jattyǵýlar ótkizý jáne qorǵanys ónerkásibi salasyndaǵy baılanystardy keńeıtýdiń mańyzdylyǵyn atap ótti.

Eske salsaq, Qasym-Jomart Toqaevtyń Túrkııa Respýblıkasyna memlekettik sapary Túrkııanyń negizin qalaýshy ári tuńǵysh Prezıdenti Mustafa Kemal Atatúriktiń rýhyna taǵzym etýden bastaldy.