Qazaqstan men Túrkııa kásipkerleri 472,6 mln dollarǵa memorandým bekitti
Qazaqstan-túrik bıznes forýmynyń qorytyndysy boıynsha taraptar agroónerkásiptik keshen, densaýlyq saqtaý, mashına jasaý, metallýrgııa, jeńil ónerkásip, logıstıka jáne týrızm salasyndaǵy jobalardy iske asyrý boıynsha 10 qujatqa qol qoıdy.
Olardyń arasynda Almaty qalasynda ekinshi farmatsevtıka zaýytyn salý týraly kelisim, Nur-Sultan qalasynda Medıtsınalyq jáne ındýstrııalyq respıratorlar shyǵaratyn zaýyt týraly kelisim, Almaty qalasyndaǵy avtojoldarǵa arnalǵan metall bolat konstrýktsııalaryn óndirý zaýyty kelisimi jáne Nur-Sultan qalasynda saýda, oıyn-saýyq ortalyǵyn salý týraly kelisim bar.
«Túrkııa men Qazaqstan – bekem baılanystary bar baýyrlas eki halyq, sonymen qatar dinı jáne tildik qundylyqtarymyz da bar. Eki el arasyndaǵy dostyq baılanystar barlyq jaǵynan damyp keledi. Búgingi kásipkerlerimiz bekitetin kelisimder ekonomıkalyq yntymaqtastyǵymyzdyń mehanızmderin odan ári nyǵaıtatynyna senemiz. Qańtar oqıǵalary kezinde de osy yntymaq-birligimizdiń irgesi sógilmeıtinin kórdik. Árdaıym bir-birimizge qoldaý kórsetip, ortaq jobalar jalǵasa beredi dep oılaımyz», - dedi Túrkııa Respýblıkasynyń vıtse-prezıdenti F. Oktaı «Rixos President Astana» qonaq úıinde ótken Qazaqstan-Túrkııa bıznes-forýmynda.
Óz sózinde Fýat Oktaı Túrkııa álemdegi úlken ekonomıkalardyń biri ekenin atap ótti.
«Pandemııa kezinde Túrkııa memlekettik salada, jeke salada da ekonomıkasyn ári qaraı jalǵastyra berdi. Bizdiń ekonomıkamyz 11 paıyzǵa damyp, sońǵy 10 jyldaǵy eń joǵary kórsetkishke jetti. Bizdiń eksporttyq úlesimiz de jaqsy damyp keledi. Túrkııanyń eksporty sońǵy 21 jyl ishinde alǵashqy rekordtyq deńgeıge jetti. Bul aldyńǵy jylǵa qaraǵanda 56 mlrd dollarǵa artyp, 225 mlrd dollarǵa jetti. Syrtqy saýdada da kórsetkishter 2021 jyly shamamen 500 mlrd dollarǵa jetti. Qazaqstanda kórshiles eldermen salystyrǵanda myqty naryq ortalyǵy bolýǵa áleýeti bar. Osy múmkindikti jaqsy paıdalaný kerek», - dedi Túrkııa Respýblıkasynyń vıtse-prezıdenti.
Onyń aıtýynsha, Qazaqstanda túrik fırmalary daıyn kıimnen dári ındýstrııasyna deıin túrli jobalardy júzege asyryp keledi.
«Túrik merdigerleri Qazaqstanda 27 mlrd dollar deńgeıinde 508 jobada óz qoltańbasyn qaldyrǵan. Kaspıı teńizinde 750 mln dollarlyq joba bar, 650 mln dollarlyq Ekspo ǵımaratynyń jobasy, odan basqa «Aqtoǵaı Mys» kesheni sekildi úlken jobarlarda merdigerlik jasady. Oǵan qosa 11 aı sekildi qysqa ǵana ýaqytta aıaqtalǵan Túrkistan halyqaralyq áýejaıy bar. Bular da tolyqtaı túrik ınvestıtsııasy arqyly júzege asty. Qańtar oqıǵalarynan keıin de Qazaqstandaǵy túrik fırmalarynyń yntymaqtastyǵy senimdi túrde jalǵasyp jatyr. Osy máselede ınvestorlar men ınvestıtsııalardy qorǵaýǵa Q. Toqaev bergen kepildemeleri de úlken mańyzǵa ıe. Sondyqtan Qazaqstanǵa túrik kásipkerleri atynan alǵysymdy bildirgim keledi», - dedi F. Oktaı.
Aıta keteıik, elordada Túrkııa Respýblıkasynyń Vıtse-Prezıdenti Fýat Oktaı myrzanyń Qazaqstan Respýblıkasyna sapary sheńberinde Qazaqstan- Túrkııa bıznes-forýmy ótip jatyr. Pandemııaǵa qaramastan úshinshi jyl qatarynan Qazaqstanǵa Túrkııadan rekordyq kólemde ınvestıtsııalar salyp keledi.
QR Premer-Mınıstri Álıhan Smaıylov Qazaqstan-Túrkııa bıznes-forýmynda birlesip jumys isteýge tıimdi bolatyn birqatar salany ataǵan edi.