Qazaqstan men Túrkııa bir-biriniń halyqaralyq bastamalaryna únemi qoldaý kórsetedi - Túımebaev

NUR-SULTAN. QazAqparat – Búgin Qazaqstan halqy Assambleıasy Tóraǵasynyń orynbasary Janseıit Túımebaev Qazaqstandaǵy Túrik Respýblıkasynyń Tótenshe jáne ókiletti elshisi Ýfýk Ekıdjımen kezdesti, dep habarlaıdy QazAqparat QHA baspasóz qyzmetine silteme jasap.

Qazaqstan men Túrkııa strategııalyq seriktester bolyp tabylady. Eki eldiń tarıhynda, tili men mádenıetinde uqsastyq pen sáıkestikter kóp.

Túrkııa Qazaqstannyń táýelsizdigin alǵashqy bolyp moıyndaǵan memleketterdiń biri. 1992 jyly eki el arasynda dıplomatııalyq qarym-qatynas ornady. Al Qazaqstannyń sheteldegi alǵashqy elshiligi Ankara qalasynda ashylǵan bolatyn.

«Biz ortaq turaqty bolashaq qurý maqsatynda kópjaqty yntymaqtastyq qurýǵa umtylyp kelemiz. Búgingi tańda ekijaqty ózara yqpaldastyq barlyq salalardy qamtyp, serpindi damýda», - dedi Janseıit Túımebaev.

Bizdiń elderimizdiń álemdik qaýymdastyqtaǵy ustanymdary da úndes. Qazaqstan men Túrkııa bir-biriniń halyqaralyq bastamalaryna únemi qoldaý tanytyp otyrady. Ekijaqty syńdarly dıalogtan basqa, eki el álemdik qaýymdastyq alańdarynda da kópjaqty seriktestik baǵytynda birlesken jobalardy júzege asyrýda.

Túrkııa Qazaqstannyń Ortalyq Azııadaǵy kóshbasshylyq rólin moıyndaıdy jáne ony aımaqtaǵy mańyzdy seriktes dep sanaıdy.

Eki el úshin de jalpytúrki elderiniń ózara ıntegratsııalanýy ózekti másele bolyp tabylady. Túrki yqpaldastyǵy jónindegi basty saıası uıym – Túrki keńesi eki eldiń bastamasymen qurylǵan bolatyn. Búginde halyqaralyq deńgeıdegi túrki álemine qatysty mádenı-gýmanıtarlyq baılanystardy nyǵaıtý, nátıjeliligin arttyrý týraly máselelerdiń mańyzdylyǵy joǵary bolyp otyr.