Qazaqstan men Túrkııa áskerıleri birlese daıyndalatyn boldy

ASTANA. QazAqparata - QR Parlamenti Májilisiniń jalpy otyrysynda «Qazaqstan Respýblıkasynyń Úkimeti men Túrkııa Respýblıkasynyń Úkimeti arysyndaǵy arnaıy maqsattaǵy bólimshelerdiń oqý-jattyǵýlaryn ótkizý kezinde qabyldaýshy taraptyń qoldaý kórsetýi týraly ózara túsinistik memorandýmyn ratıfıkatsııalaý týraly» zań jobasy maquldandy, dep habarlaıdy QazAqparat.

«Momorandýmǵa ótken jyly 20 qańtarda qol qoıyldy. Qujattyń maqsaty taraptardyń mindettemeleri men jaýapkershiligin belgileý bolyp tabylady. Sonymen qatar oqý-jattyǵý ótkizý kezinde qabyldaýshy taraptyń qoldaý kórsetýiniń negizgi qaǵıdattaryn aıqyndaıdy»,-dedi QR Qorǵanys mınıstriniń orynbasary Talǵat Muhtarov zań jobasyn tanystyrý barysynda.

Onyń sózine qaraǵanda, memorandýmnyń erejelerine sáıkes, oqý-jattyǵý ótkizý barysynda qabyldaýshy tarap jiberýshi jaqtyń bólimshelerine tehnıka men qarý-jaraqty ákelýde, memleket ishinde alyp júrýde, joldardy paıdalanýda ruqsat etedi. Sondaı-aq jeke quramdy qamtamasyz etip otyrǵan sapada jiberýshi taraptyń bólimshesin tegin ornalastyrady. Janarmaı, kólik jáne baılanys quraldary beriledi, medıtsınalyq baǵytta qyzmetter kórsetiledi.

«Óz kezeginde jiberýshi taraptyń bólimshesi qabyldaýshy memlekettiń zańnamasyn jáne oqý-jattyǵýlardy ótkizýdiń josparynda naqtylanǵan rásimderdi saqtaıdy. Jattyǵýlar Qazaqstan men Túrkııa qarýly kúshteri arnaıy maqsattaǵy bólimsheleriniń kásibı deńgeıiniń jaýyngerlik daıarlyǵyn arttyrýǵa yqpal etetin bolady. Sondaı-aq áskerlerdiń arasyndaǵy ózara is-qımyl máselelerin pysyqtaýǵa múmkindik beretinin atap ótken jón»,-dedi T. Muhtarov.