Qazaqstan men Túrikmenstan azamattyq qorǵanys salasynda ózara kómektiń talaptaryn naqtylady

ASTANA. QazAqparat – Májilistiń jalpy otyrysynda «Qazaqstan Respýblıkasynyń Úkimeti men Túrikmenstannyń Úkimeti arasyndaǵy Azamattyq qorǵanys, tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Atalǵan kelisimge 2021 jylǵy 25 qazanda Ashhabadta qol qoıyldy. Kelisimniń maqsaty - Qazaqstan men Túrkimenstannyń azamattyq qorǵaý salasyndaǵy yntymaqtastyǵy baǵytynda quqyqtyq baza qurý.

Kelisimde eki eldiń azamattyq qorǵanys, apat nemese ózge de zilzala jaǵdaıynda erikti jáne ózara kómek kórsetý jónindegi mamandardy oqytý salasyndaǵy ózara is-qımyly aıqyndalady.

QR Tótenshe jaǵdaılar vıtse-mınıstri Marat Kúldikovtiń aıtýynsha, eki eldiń bireýiniń aýmaǵynda tótenshe jaǵdaı bolǵan kezde, birlesken is-qımyldyń arqasynda osy kelisim erejesi iske asyrylady.

«Atalǵan kelisim elderdiń quzyretti organdary arasyndaǵy ózara is-qımyldy qamtamasyz etýge, halyqqa qaýip tóngen kezde tıisti áreketterge daıyndaý salasynda tájirıbe almasýǵa, memleketterdiń oqý oryndarynda azamattyq qorǵaý salasynda mamandar daıarlaýdy júzege asyrýǵa, aqparat almasýǵa, sondaı-aq tótenshe jaǵdaıǵa qatysty kómek kórsetýge múmkindik beredi», - dedi vıtse-mınıstr.

Onyń sózine qaraǵanda, zań jobasy teris saldarǵa ákep soqpaıdy jáne qosymsha qarjylyq shyǵyndardy talap etpeıdi.

Budan buryn habarlanǵandaı, Májiliste tótenshe jaǵdaı kezinde Ózbekstanmen arada kómek kórsetý týraly qujat maquldandy.

Foto: gov.kz