Qazaqstan men Túrikmenstan 2021-2023 jyldarǵy yntymaqtastyq baǵdarlamasyna qol qoıdy
23:38, 18 Aqpan 2021
NUR-SULTAN. QazAqparat –Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi men Túrikmenstan Mınıstrler kabıneti Tóraǵasynyń orynbasary - Syrtqy ister mınıstri Rashıd Meredov beınekonferentsııa rejıminde SІM-aralyq konsýltatsııa ótkizdi, dep habarlaıdy QazAqparat.
QR Syrtqy ister mınıstrliginen málim etkendeı, taraptar ekijaqty yntymaqtastyqtyń, atap aıtqanda saýda-ekonomıkalyq, tranzıttik-kóliktik jáne mádenı-gýmanıtarlyq salalardaǵy ózekti máselelerin talqylady. Joǵary jáne asa joǵary deńgeıdegi aldaǵy is-sharalar kestesi qarastyryldy.
«Óńirlik jáne halyqaralyq uıymdar aıasyndaǵy ózara is-qımyl jóninde pikir almasyldy. Ortalyq Azııa memleketteri basshylarynyń konsýltatıvtik kezdesýleri formatyndaǵy dıalogty damytýǵa erekshe nazar aýdaryldy.
Kelissózder qorytyndysy boıynsha taraptar Qazaqstan Respýblıkasynyń Syrtqy ister mınıstrligi men Túrikmenstan Syrtqy ister mınıstrligi arasyndaǵy 2021-2023 jyldarǵa arnalǵan yntymaqtastyq baǵdarlamasyna qol qoıdy», - dedi mınıstrlikten.