Qazaqstan men Tájikstan Prezıdentteri erteń qandaı máselelerdi talqylaıdy

ASTANA. QazAqparat - Qazaqstannyń Tájikstandaǵy Elshisi Nurlan Seıtimov Elbasy Nursultan Nazarbaevtyń Tájikstan basshysy Emomalı Rahmonmen kezdesýiniń kún tártibindegi mańyzdy máselelerdi atady, dep habarlaıdy QazAqparat tilshisi.

«Memleket basshylarynyń erteńgi kezdesýi shaǵyn jáne keńeıtilgen quramda ótip, onyń barysynda óńirlik kún tártibindegi jáne halyqaralyq formattaǵy ózekti máseleler talqyǵa túsedi. Sonymen qatar saýda-ekonomıkalyq qarym-qatynasymyzdy sapaly jańa deńgeıge kóterý máselelerine de aıryqsha nazar aýdarylady. Ádette, bizdiń taraptyń taýar aınalymynyń tiziliminde astyq pen un ǵana qalyptasqan. Alaıda, ýaqyt óz degenin jasatyp, lokomotıvter, avtomobılder syndy jańa dúnıelerdi ilgeriletýdi talap etedi. Sondyqtan taýarlarymyzdy Tájikstan naryǵyna odan ary eksportqa shyǵarý joldary talqylanady», - dedi ol búgin elimizdiń Syrtqy ister mınıstrliginde BAQ ókilderine ótkizgen baspasóz máslıhatynda.

N.Seıtimovtiń atap ótýinshe, kelissózder qorytyndysynda Memleket basshylarynyń birlesken málimdemesin qabyldaý josparlanǵan. Munan bólek, úkimetaralyq úsh kelisimdi rásimdeý de kózdelip otyr. Atalǵan qujattardyń barlyǵy da kóshi-qon máselelerine, bir eldiń azamatynyń ekinshi elge kelý tártibine qatysty bolmaq.

«Sondaı-aq eki memlekettiń Syrtqy ister mınıstrlikteri arasynda yntymaqtastyq baǵdarlamasyna qol qoıý kózdelgen. Ol elder arasynda ekijaqty máselelermen qatar kópjaqty formattaǵy yntymaqtastyq boıynsha saıası konsýltatsııalar ótkizý tártibi men kestesin qarastyrady. Mundaı kelisim árbir eki jylda bir ret jańaryp otyrady», - dedi Elshi.