Qazaqstan men Sýrınam arasynda vıza talaptary jeńildemek
«Qazaqstan Úkimeti men Sýrınam Respýblıkasynyń Úkimeti arasyndaǵy dıplomatııalyq jáne qyzmettik pasport ıelerin vıza talabyndan bosatý týraly kelisimge qol qoıý týraly» QR Úkimeti qaýlysynyń jobasy ashyq normatıvtik-quqyqtyq aktiler portalynda jarııalandy.
Qujatta Qazaqstannyń Birikken Ulttar Uıymy janyndaǵy Turaqty Ókili Aqan Aqasuly Rahmetýllın qos el úkimeti arasyndaǵy dıplomatııalyq jáne qyzmettik pasport ıelerin vıza talaptarynan bosatý týraly kelisimge Qazaqstan Úkimeti atynan qol qoıatyny, oǵan qaǵıdattyq sıpaty joq ózgerister men tolyqtyrýlar engizýge ruqsat berilgeni jazylǵan.
Kelisim kúshine engennen keıin taraptardyń jaramdy dıplomatııalyq jáne qyzmettik pasport ıeleri bir-biriniń elderiniń aýmaǵyna bir jáne kóp márte kelý, ketý, transıtpen ótý, ýaqytsha bolý úshin vızalyq talaptardan birinshi kelgen kúnnen bastap árbir 180 (júz seksen) kúndik kezeń ishinde 30 (otyz) kúnge deıin merzimge bosatylady.
Bir tarap memleketiniń jaramdy dıplomatııalyq jáne qyzmettik pasporty bar azamattary, ekinshi tarap memleketiniń aýmaǵynda dıplomatııalyq ókildiktiń, konsýldyq mekemeniń nemese halyqaralyq uıymdar janyndaǵy óz memleketteri ókildikteriniń qyzmetkerleri retinde qyzmettik issaparda bolsa, onda taraptar memleketteriniń aýmaǵyna olardyń ókiletterin oryndaý merziminde vızasyz kire alady, onda bola alady, tranzıtpen óte alady jáne kete alady.
Sýrınam Respýblıkasynyń aýmaǵynda júrip-turý kezinde ózderiniń jol júrý qujatyn joǵaltyp alǵan Qazaqstan azamattary Qazaqstan Respýblıkasynyń dıplomatııalyq nemese konsýldyq mekemeleri bergen jol júrý qujattaryn paıdalana otyryp, Sýrınam aýmaǵynan tys jerge kete alady.
Dál osyndaı múmkinshilik Sýrınam azamattaryna da kózdelgen.
Qaýly jobasy 8 jeltoqsanǵa deıin qoǵam talqysyna shyǵarylyp otyr.