Qazaqstan men Soltústik Kaspıı merdiger kompanııalary arasynda birqatar daý bar – Qashaǵan operatory

<p>Bıyl naýryzda Ekologııa jáne tabıǵı resýrstar mınıstrliginiń baspasóz qyzmeti Qashaǵan munaı ken ornynyń operatory North Caspian Operating Company kompanııasyn ekologııalyq buzýshylyqtar úshin jaýapkershilikke tartýdy talap etip sotqa júgingenin rastady. Qashaǵan operatory aıyppul týraly aqparattyń joqtyǵyn aıtyp otyr, dep habarlaıdy Kazinform.</p>

«Qazaqstan Respýblıkasynyń memlekettik quzyrly organdary NCOC kompanııasynyń nysandarynda ekologııalyq tekserý júrgizdi. Qashaǵan operatorynda kúkirt saqtaýǵa qatysty aıyppul salý týraly aqparat joq. NCOC kompanııasy kúkirtke qatysty jumystardy uıymdastyrý qyzmetin jaýapkershilikpen jáne Qazaqstan Respýblıkasynyń zańnamasyna sáıkes, sondaı-aq qoldanystaǵy standarttar men úzdik tájirıbege sáıkes iske asyrady», - delingen NCOC kompanııasynyń Kazinform agenttiginiń saýalyna bergen jaýabynda.

Sondaı-aq NCOC syrtqy qarym-qatynastar bólimi kúkirt saqtaýǵa qatysty tekserý boıynsha birqatar daýdyń baryn málim etti.

«Qazaqstan Respýblıkasy men Soltústik Kaspıı boıynsha ónim bólisý týraly kelisiminiń (SKÓBK) sheńberindegi merdiger kompanııalar arasynda (Ulttyq munaı kompanııasynyń enshiles KMG Kashagan B.V. kásipornynan basqa) SKÓBK sheńberinde tórelik jáne sarapshylyq anyqtaýdy qajet etetin belgili erejelerdi qoldanýǵa qatysty birqatar daý bar. Soltústik Kaspıı boıynsha ónim bólisý týraly kelisiminiń merdiger kompanııalar Qazaqstan Respýblıkasynyń zańdary men qoldanystaǵy standarttar men ozyq tájirıbelerge sáıkes áreket ettik dep esepteıdi. Talqylaýdyń qupııa sıpatyna baılanysty biz qosymsha túsinikteme bere almaımyz», - deıdi kompanııadan.

Aıta keteıik, bıyl naýryzda Qashaǵan operatoryna $5,1 mlrd aıyppul salynýy múmkin ekendigi týraly habarlaǵan edik.

Buǵan deıin Bloomberg basylymy QR Ekologııa jáne tabıǵı resýrstar mınıstrligi North Caspian Operating Company kompanııasyn ekologııalyq talaptardy buzǵany úshin $5,1 mlrd kóleminde aıyppul salýdy talap etip, sotqa júgingenin habarlaǵan edi.

Eske salsaq, bıyl 6 naýryzda kúkirtti zańsyz saqtaý faktisi boıynsha Atyraý oblysy boıynsha ekologııa departamenti North Caspian Operating Company kompanııasynyń qyzmetine tekserý júrgizdi.