Qazaqstan men Slovakııa áskerı yntymaqtastyǵy nyǵaıa túsýde

<p>ASTANA. KAZINFORM — Slovakııa Premer-Mınıstriniń orynbasary — Qorǵanys mınıstri Robert Kalınıak bastaǵan delegatsııanyń Qazaqstanǵa jumys sapary barysynda elimizdiń memlekettik organdary men vedomstvolarynyń basshylarymen birqatar kezdesýleri ótti. Bul týraly ІІM QR Ulttyq ulanynyń baspasóz qyzmeti habarlady.</p>

Sapar aıasynda Robert Kalınıak Qazaqstan Respýblıkasy Ulttyq ulannyń Bas qolbasshylyǵynda Іshki ister mınıstriniń orynbasary — Ulttyq ulannyń Bas qolbasshysy general-maıor Ańsaǵan Baltabekovpen kezdesý ótkizdi. Slovakııa eliniń delegatsııasyna Ulttyq ulannyń qyzmettik-jaýyngerlik qyzmeti týraly qysqasha baıandama usynyldy.

— Qazaqstan Respýblıkasynyń Ulttyq ulany Slovakııanyń Qorǵanys mınıstrligimen ózara tıimdi yntymaqtastyqqa, sondaı-aq basqa da vedomstvolary men kásiporyndarymen ózara is-qımyldy jolǵa qoıý jónindegi usynystardy qaraýǵa daıyn. Biz tájirıbe almasý, birlesken oqý-jattyǵýlar men áskerı — tehnıkalyq yntymaqtastyqty qosa alǵanda, ártúrli salalardaǵy yntymaqtastyqty nyǵaıtýdy qoldaımyz, — dedi general-maıor Ańsaǵan Baltabekov.

Qatysýshylar kezdesýde ekijaqty áskerı jáne áskerı-tehnıkalyq yntymaqtastyq máselelerin talqylap, odan ári ózara is-qımyldyń perspektıvalaryn aıqyndady.

Óz kezeginde Robert Kalınıak qorǵanys ónerkásibi kesheni shyǵaratyn ónimderdiń keń spektrin usyndy. Slovakııanyń qazirgi geosaıası jaǵdaıyn eskere otyryp damýynyń jańa baǵyttaryn aıtty.

— Biz qazaqstandyq áriptesterimizge zamanaýı qarý-jaraq pen tehnıkany ǵana emes, sonymen qatar áskerı qyzmetshilerdi túrli mamandyqtar boıynsha oqytýdyń keń spektrin usynýǵa daıynbyz, — dedi Slovakııa Qorǵanys mınıstri.

Kezdesý qorytyndysy boıynsha taraptar ekijaqty yntymaqtastyqty damytý jónindegi jumysty jandandyrýǵa jáne ártúrli deńgeıdegi baılanystardy qoldaýǵa kelisti.

Buǵan deıin habarlaǵanymyzdaı, Slovakııa premer-mınıstri qastandyq jasaǵan adamdy keshiretinin aıtty.