Qazaqstan men Sıngapýr arasynda bıotehnologııa men medıtsına boıynsha yqpaldasýǵa mol múmkindik bar
– Bizdiń eldiń farmatsevtıka salasy – óńirdegi eń qarqyndy damyp kele jatqan naryqtardyń biri. Pfizer, Roche, GE Healthcare jáne Philips sekildi álemdik jetekshi kompanııalar dári-dármek pen medıtsınalyq qural-jabdyqtardyń jergilikti óndirisin ashýdy josparlap otyr. Biz birlesken zertteýlerdi, sondaı-aq dáriler men bıopreparattar óndirisin qarjylandyrý úshin «Báıterek» ulttyq holdıngi men Forebright kompanııasynyń ınvestıtsııalyq qor qurý josparyn quptaımyz, – dedi Memleket basshysy.
Prezıdent tsıfrlyq sektordy ónimdilik pen ekonomıkalyq ósimniń artýyna áser etetin taǵy bir perspektıvti baǵyt retinde atady.
Qasym-Jomart Toqaevtyń aıtýynsha, Qazaqstan Sıngapýr sııaqty Eýrazııa qurlyǵynda jetekshi tehnologııalyq jáne IT-habqa aınalýdy kózdeıdi. Naqtyraq aıtqanda, elimiz jańa ári keshendi IT-jobalar, ásirese jasandy ıntellekt salasynda mańyzdy bastamalar jasaý úshin R&D jobalar, startaptar, bilim sekildi túrli baǵyt boıynsha aýqymdy yntymaqtastyqty jolǵa qoıýǵa múddeli.
Qasym-Jomart Toqaev sózin qorytyndylaı kele, «Astana» halyqaralyq qarjy ortalyǵynyń ınvestıtsııa tartý isindegi artyqshylyqtaryna nazar aýdardy.
– Búginde AHQO alańynda álemniń 80 eliniń eki myńnan astam kompanııasy jumys isteıdi. Olar Qazaqstanǵa jáne búkil óńirge ınvestıtsııa tartýǵa yqpal etedi. Sıngapýrdyń 30-dan astam kompanııasy AHQO-nyń rezıdenti sanalady. Keleshekte olardyń sany arta túsedi dep senemin. Qarjy ortalyǵy Sıngapýrdyń Aqsha-kredıt basqarmasymen qarjy tehnologııasy, «jasyl qarjy» jáne ıslam bankıngi salalaryndaǵy ózara tıimdi seriktestikti damytý úshin tyǵyz qarym-qatynas ornatqan. AHQO-da Qazaqstan-Sıngapýr tikeleı ınvestıtsııa tartý qorynyń qurylýy eki eldegi birlesken kásiporyndardy qarjylandyrý úshin ońtaıly alań bola alady, – dedi Prezıdent.