Qazaqstan men Shveıtsarııa arasynda zergerlik zattar saýdasynyń talaptary jeńildeıdi

ASTANA. QazAqparat – Senattyń jalpy otyrysynda «Qazaqstan Respýblıkasynyń Úkimeti men Shveıtsarııa Konfederatsııasynyń Federaldyq Keńesi arasyndaǵy baǵaly metaldardan jasalǵan buıymdardaǵy synamalyq tańbany ózara taný jónindegi kelisimdi ratıfıkatsııalaý týraly» Zań maquldandy, dep habarlaıdy QazAqparat tilshisi.

Bul kelisimniń maqsaty – eki memleket arasyndaǵy baǵaly metaldardan jasalǵan buıymdardyń aınalymyn ońtaılandyrý. Zań eki memlekettiń ekonomıkalyq ózara is-qımylyn damytýdy jáne otandyq zergerlik ónerkásipti qoldaýdy kózdeıdi.

Kelisim Qazaqstan Respýblıkasy men Shveıtsarııa Konfederatsııasy arasynda baǵaly metaldardan jasalǵan zattardyń saýdasyn damytýǵa, sondaı-aq metaldyń quramyn qaıta tekserý jáne qosarlanǵan tańbalaý rásimin ońtaılandyrýǵa yqpal etedi.

Bul qadamdar zergerlik zattardy eksporttaý kezinde ákimshilik júktemeni azaıtýǵa múmkindik beredi.

Budan buryn habarlanǵandaı, Shveıtsarııa jaǵy osyndaı kelisimderdi Reseı Federatsııasymen, Frantsııamen, Italııamen, Avstrııamen, Ispanııamen bekitti.