Qazaqstan men Saýd Arabııasy arasyndaǵy jańa áýe reısteri kóbeımek

ASTANA. QazAqparat – QR Indýstrııa jáne ınfraqurylymdyq damý mınıstri Qaıyrbek Óskenbaev Qajylyq jáne ýmra mınıstri Taýfık ben Faýzan bın Mýhammad Al-Rabıa bastaǵan Saýd Arabııasynyń delegatsııasymen kezdesti, dep habarlaıdy QazAqparat.

Kezdesý barysynda taraptar eki el arasyndaǵy áýe tasymalyn odan ármen arttyrý jáne ushý geografııasyn keńeıtý turǵysynda kelissózder júrgizdi. Mınıstr Qaıyrbek Óskenbaev Qazaqstan men Saýd Arabııasy arasyndaǵy avıatsııa salasyndaǵy yntymaqtastyq artyp kele jatqandyǵyn baıandady.

«2015 jyldan bastap otandyq «SCAT» jáne saýdarabııalyq «Fly Nas» avıakompanııalary qajylyq saparǵa attanǵandar úshin tikeleı áýe tasymalyn oryndaýda. Ótken jyly Saýd Arabııa tarapy qajylyqqa barýǵa nıet etken qazaqstandyqtar úshin 4 myń kvota bóldi. Bes paryzdyń birin oryndaýshylardy tasymaldaý kezinde Medına jáne Djıddaǵa Astana, Almaty, Shymkent jáne Aqtaýdan 19 reıs uıymdastyryldy», – dep atap ótti vedomstvo basshysy.

Búginde «SCAT» avıakompanııasy jyldyń barlyq merziminde jıiligi aptasyna 1-2 ret Almaty jáne Shymkentten Medına, Djıdda baǵytynda turaqty charterlik áýe tasymalyn oryndaýda. Sonymen qatar 2022-2023 jyldardaǵy kúzgi jáne qysqy navıgatsııalyq maýsymda birqatar otandyq áýe kompanııalary turaqty jolaýshylar tasymalyn uıymdastyrýdy josparlap otyr. Atap aıtqanda, «Air Astana» Almaty – Medına baǵytynda, «Fly Arystan» Aqtaý – Medına baǵyttarynda aptasyna jıiligi 2 retten turaqty reıster oryndamaq.

Qazaqstan tarapy Saýd Aravııasynyń azamattyq avıatsııa bıligi basshylarymen kelissózder júrgizýde. Osyǵan oraı bıylǵy 29 qyrkúıekte Kanadanyń Monreal qalasynda ótetin ICAO-ǵa qarasty Azamattyq avıatsııa uıymy Halyqaralyq Assambleıasynyń 41-sessııasy aıasynda eki memleket arasyndaǵy ózara túsinistik týraly memorandýmǵa qol qoıylady dep kútilýde.

Onyń sheńberinde avıakompanııalar jolaýshylar tasymalyn aptasyna 4-ten 8-ge deıin arttyrý kózdelip otyr. Bul – Qazaqstandaǵy «ashyq aspan» rejımi aıasynda júzege asyrylmaq.

Óz kezeginde Taýfık Faýzan Al-Rabıa mınıstrge jan-jaqty qoldaýy úshin alǵysyn bildirip, elder arasyndaǵy tikeleı reısterdiń ashylýy ózara qarym-qatynasty nyǵaıtýǵa eleýli úles qosatynyn atap ótti. Sondaı-aq ol áýe tasymalyn oryndaýǵa saýdarabııalyq avıakompanııalar da múddeli ekendigin jetkizdi.

«Sizdiń bastamańyzben usynylǵan memleketter arasyndaǵy áýe tasymalyn odan ármen arttyrý men ushý geografııasyn keńeıtý boıynsha eki eldiń áýe bıligi ókilderiniń kelissózderi jemisti nátıjesin berýde. Jaqyn arada tikeleı áýe qatynastary qaıta jandanatyn bolady», – dedi Saýd Arabııasynyń Qajylyq jáne ýmra mınıstri.

Foto: gov.kz