Qazaqstan men Saýd Arabııasy arasyndaǵy áýe reısteri úsh ese artady

ASTANA. QazAqparat - Kanadanyń Monreal qalasynda ótip jatqan Halyqaralyq azamattyq avıatsııa uıymy (ICAO) Assambleıasynyń 41-sessııasy aıasynda Qazaqstan men Saýd Arabııasynyń azamattyq avıatsııa salasyndaǵy bılik ókilderi ózara kelissózder júrgizdi, dep habarlaıdy QazAqparat.

QR Indýstrııa jáne ınfraqurylymdyq damý mınıstri Qaıyrbek Óskenbaev pen Koroldiktiń Qajylyq jáne umra mınıstri Taýfık ben Faýzan bın Muhammed Ál Rabıanyń kezdesýi barysynda taraptar Qazaqstan men Saýd Arabııasy arasyndaǵy tikeleı áýe qatynasyn ornatýdyń tetikterin talqylady.

Basqosýda elder arasyndaǵy saýda-ekonomıkalyq, ınvestıtsııalyq jáne mádenı yntymaqtastyqty odan ári damytý úshin tikeleı áýe qatynasynyń mańyzdylyǵyna da nazar aýdaryldy.

Kezdesý qorytyndysy boıynsha arnaıy qujatqa qol qoıyldy. Oǵan sáıkes, eki memleket arasyndaǵy turaqty jolaýshylar reısteriniń sany aptasyna 4-ten 14 reıske deıin, ıaǵnı 3 esege deıin ulǵaımaq.

Qazaqstan tarapy 2022-2023 jyldardaǵy kúzgi jáne qysqy navıgatsııalyq maýsymda birqatar otandyq áýe kompanııalary turaqty jolaýshylar tasymalyn uıymdastyrýdy josparlap otyr. Atap aıtqanda, «Air Astana» Almaty – Medına baǵytynda, «Fly Arystan» Aqtaý – Medına baǵyttarynda aptasyna jıiligi 2 retten turaqty reıster oryndamaq. Sondaı-aq otandyq SCAT kompanııasy da aptasynda 2 ret Almaty –Djıdda baǵytynda áýe tasymalyn uıymdastyrýdy josparlaýda.

Al saýdarabııalyq Fly Nas áýe tasymaldaýshysy Djıdda – Almaty baǵytynda turaqty reıs ashýdy josparlap otyr.

Kezdesý sońynda delegatsııa ókilderi tikeleı áýe qatynastarynyń ashylýy memleketter arasyndaǵy ózara qarym-qatynasty nyǵaıtýǵa eleýli úles qosatynyn atap ótip, bul taraptaǵy jumystardy odan ármen jalǵastyrýǵa ýaǵdalasty.

Foto: gov.kz