Qazaqstan men Rýmynııa arasynda saýda-ekonomıkalyq baǵyttaǵy ahýal talqylandy

BÝHAREST. QazAqparat - Qazaqstannyń Rýmynııadaǵy Elshisi Nurbah Rústemov Ekonomıka, kásipkerlik jáne týrızm mınıstri, Saýda-ekonomıkalyq yntymaqtastyq jónindegi Qazaq-Rýmyn Úkimetaralyq komıssııasynyń teń tóraǵasy Klaýdıý Nesýımen kezdesti. Bul týraly QazAqparat Elshilikke silteme jasap habarlaıdy.

Elshi N.Rústemov K.Nesýıdi Úkimetaralyq komıssııanyń rýmyn tarapynan basshysy qyzmetine taǵaıyndalýymen quttyqtap, sonymen qosa oǵan Mınıstr laýazymynda sáttilik tiledi.

Taraptar ekijaqty qatynastardyń aǵymdaǵy jaǵdaıyn, Nur-Sultanda qyrkúıek aıyna josparlanǵan Úkimetaralyq komıssııanyń kezekti otyrysynyń kún tártibin, elder arasyndaǵy tikeleı reısterdiń ashylýyn kózdeı otyryp týrızm salasyndaǵy yntymaqtastyqty damytý perspektıvalaryn, sondaı-aq saýda baǵytyndaǵy taýarlar túrin ártaraptandyrý máselesin talqylady.

K.Nesýı qazaqstandyq tarappen ózara tıimdi seriktestikti damytýǵa daıyn ekenin atap ótip, eki eldiń jobalary men iskerlik qoǵamdastyqtaryna barlyq jaǵynan qoldaý kórsetýge nıet bildirdi.

Kezdesý barysynda taraptar Úkimetaralyq komıssııanyń otyrysy aıasynda bıznes-forým ótkizý máselesin, Transkaspıılik halyqaralyq kólik dáliziniń áleýetin ashýdyń mańyzdylyǵyn atap ótti.

Mınıstr oǵan qosa Úkimetaralyq komıssııanyń teń tóraǵasy retinde Elshiliktiń mádenı-gýmanıtarlyq sharalaryna qatysýǵa nıet bildirdi.