Qazaqstan men RF Baıqońyr halqynyń quqyqtaryn qorǵaýǵa qatysty kelisim jasady
Baspasóz málimetterine qaraǵanda, Qazaqstanǵa jasaǵan sapary úshin A.Bastrykınge alǵys bildirgen Q.Qojamjarov, quqyq qorǵaý salasyndaǵy ekijaqty qarym-qatynastyń mańyzdylyǵyn atap ótti.
«Qazaqstan men Reseı strategııalyq seriktes elder, sonyń ishinde qylmystylyqqa qarsy is-qımyl máselesinde de», - dedi Bas prokýror.
A.Bastrykın bolsa ekijaqty yntymaqtastyqtyń tarıhı ereksheligine toqtaldy.
«Tergeý komıtetiniń 11 jyldyq qyzmetinde aramyzda naqty qarym-qatynasty ornattyq. Olar negizgi tájirıbelik tergeý baǵytynda júrgiziledi»,-dedi ol.
Qazaqstannyń Bas prokýratýrasy sońǵy 5 jylda Reseıden suratylǵan tulǵalardy berý týraly 131 ótinimhatty qanaǵattandyrdy. Al Reseı jaǵy 272 azamatymyzdy elge ekstradıtsııalady.
112 sottalǵan qazaqstandyq jazasyn odan ári qaraı elde óteý úshin Reseıden jetkizildi. Óz kezeginde Reseıge 242 orys azamaty qaıtaryldy.
Kezdesý barysynda taraptar Qazaqstan Respýblıkasynyń Bas prokýratýrasy jáne Reseı Federatsııasy Tergeý komıtetiniń arasyndaǵy yntymaqtastyq týraly Kelisimge, sonymen qatar «Baıqońyr» kesheni aýmaǵyndaǵy ózara qatynas jónindegi Kelisimge qol qoıdy.
Taraptar birinshi Kelisim aıasynda qylmystylyqqa qarsy is-qımyl kezinde, qylmystardy ashý men tergep-tekserý barysynda ádis-tásildermen bólisýge, sonyń ishinde terrorıstik, ekstremıstik jáne sybaılas jemqorlyq, ekonomıka men joǵary tehnologııalar baǵytynda tájirıbe bólisýge kelisti.
«Baıqońyr» kesheni aýmaǵyna qatysty yntymaqtastyq týraly Kelisim azamattardyń quqyqtary men bostandyqtaryn qorǵaýdy qamtamasyz etýde, qylmystyq ister boıynsha aldyn ala tergep-tekserýdi júrgizýde Qazaqstan-Reseı seriktestigin odan ári nyǵaıta túsedi.
«Sapar barysynda jasalǵan Kelisimder bizdiń yntymaqtastyǵymyzǵa jańa serpin berip, búgingi kúnniń qaýip-qaterine tótep berýde kúshimizdi arttyrady», - dep óz sózin qorytyndylady Bas Prokýror.