Qazaqstan men reseılik «Rosatom» arasynda qandaı memorandým jasalǵan

NUR-SULTAN. QazAqparat – Qazaqstan reseılik «Rosatom» kompanııasymen tek maman daıarlaý týraly memorandýmǵa qol qoıǵan. Ázirge elde salynýy yqtımal AES qaı eldiń tehnologııasy boıynsha salynatyny anyq emes. QR Energetıka mınıstri Bolat Aqsholaqov ortalyq kommýnıkatsııalar qyzmetinde ótken brıfıngide osyndaı málimet aıtty, dep habarlaıdy QazAqparat tilshisi.

«Álem boıynsha atom energetıkasynyń tehnologııasy Reseıde ǵana emes. AQSh-ta, Eýropada, ásirese Frantsııada jaqsy damyǵan. Japonııanyń Amerıkamen birlesken kásiporyny bar. Ońtústik Koreıada, Qytaıdyń ózinde de damyp jatyr. Sol sebepti bul suraqty áli zerttep qaraǵan joqpyz. Qazir atom stansasyn qaı jerge ornalastyrý, oǵan sý jaǵynan, tektonıka jaǵynan, jer silkinisi bolmaıtyn jerdi tańdaý boıynsha jumys júrip jatyr. Al tehnologııalar – ekinshi kezeńdegi suraq. Qaı tehnologııamen jumys isteıtinimiz týraly naqty jaýap joq», - degen mınıstr reseılik «Rosatommen» bekitilgen memorandýmnyń mazmunyna toqtaldy.

«Biiz osy jylda reseılik «Rosatommen» memorandýmǵa qol qoıdyq. Bul tek kadr daıyndaý úshin. Bizde ókinishke qaraı, atom salasynyń mamandaryn daıarlaıtyn oqý oryndary joq. Eger AES salatyn bolsaq, árıne, erteń onda jumys isteıtin adamdar, mamandar kerek. Qazir sony daıarlaý kerek. Bir stansaǵa 2000-deı adam kerek, mysaly. Ol tek qana jumysshylar emes, jaqsy deńgeıde daıyndyqtan ótken mamandar bolýǵa tıis. Olardy 4-5 jyl oqytý kerek. Odan keıin olar 2 jyldaı tájirıbeden ótedi», - dedi vedomstvo basshysy.