Qazaqstan men Reseıdiń ózara is-qımyl jasamaıtyn baǵyty joq - Prezıdent

<p>ASTANA. KAZINFORM &ndash; Qazaqstan men Reseı arasynda qandaı da bir daýly másele joq. Bul týraly Aqordada Reseı prezıdenti Vladımır Pýtınmen kelissózderdiń qorytyndysyna oraı ótken brıfıngte Memleket basshysy Qasym-Jomart Toqaev aıtty.</p>

«Búgingi kezdesý barysynda qurmetti Vladımır Vladımırovıch Pýtın ekeýmiz elderimizdiń kópjaqty formattaǵy ózara is-qımyl dınamıkasyn egjeı-tegjeıli talqyladyq. Syndarly túrde óńirlik jáne jahandyq saıasattyń ózekti máseleleri boıynsha pikir almastyq. TMD, Eýrazııalyq ekonomıkalyq odaq, ShYU, UQShU, AÓІSShK sııaqty mańyzdy óńirlik birlestikter aıasyndaǵy yntymaqtastyq boıynsha tolyq ózara túsinistigimizdi qanaǵattanýshylyqpen atap ótemin. Búginde bizdiń elderimiz ózara is-qımyl jasamaıtyn baǵyt joq desek te bolady», - dedi Memleket basshysy. 

Prezıdent eń bastysy Qazaqstan men Reseı arasynda qandaı da bir daýly másele joq ekendigin basa aıtty.

«Biz árqashanda da eki memlekettiń múddelerin barynsha eskeretin teńdestirilgen sheshimderdi tabamyz. Múmkindikti paıdalanyp, Reseıdiń qurmetti prezıdentine halyqtarymyz arasyndaǵy dostyq qarym-qatynasty nyǵaıtýǵa tynymsyz jeke kóńil bólgeni úshin alǵys bildiremin. Alda birlesken kóp jumys bar», - dedi Qasym-Jomart Toqaev.