Qazaqstan men Reseıdiń damý joldaryn óz betinshe ári derbes tańdaýy qos tarapqa kedergi keltirmeıdi – Toqaev

<p>Qazaqstan men Reseıdiń damý joldaryn óz betinshe ári derbes tańdaýy qos tarapqa kedergi keltirmeıdi. Bul týraly Aqordada Reseı Federatsııasynyń Prezıdenti Vladımır Pýtınmen keńeıtilgen quramda kelissóz ótkizgen Memleket basshysy Qasym-Jomart Toqaev aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Memleket basshysynyń aıtýynsha, Reseı Prezıdentiniń Qazaqstanǵa sapary eki el arasyndaǵy qarym-qatynasty damytý perspektıvasyn aıqyndaý turǵysynan erekshe mánge ıe. Búginde strategııalyq seriktestik jáne odaqtastyq rýhyndaǵy ekijaqty yntymaqtastyq barlyq baǵytta tabysty damyp keledi.

«Eki eldiń damý joldaryn óz betinshe ári derbes tańdaýy qos tarapqa kedergi keltirmeıdi, kerisinshe, bul teń quqyly jáne ózara tıimdi áriptestiktiń paıdaly jaǵyn eseleı túsedi. Muny Qazaqstanda da, Reseıde de jaqsy túsinedi, – dedi Prezıdent.

Qasym-Jomart Toqaev birlesken kúsh-jigerdiń arqasynda Qazaqstan men Reseı arasyndaǵy shekara eki el ekonomıkalarynyń ıgiligi úshin belsendi jumys istep jatqanyna nazar aýdardy. Munyń naqty paıdasyn shekara mańyndaǵy óńirlerde turatyn 25 mıllıonǵa jýyq adam sezinip otyr.

«Ǵasyrlar boıy bir-birimen qońsylas ómir súrgen ata-babalarymyz dostyq, senim men tatý kórshilik qarym-qatynastyń myzǵymas qundylyqtaryn bizge amanat etti. Biz bul qundylyqtardy saqtap, kelesi urpaqqa jetkizýimiz kerek», – dedi Prezıdent.

Kelissóz barysynda taraptar ekijaqty ekonomıkalyq kún tártibiniń negizgi aspektilerin jan-jaqty talqylady. Sondaı-aq aldaǵy yntymaqtastyqtyń negizgi baǵyttaryn aıqyndap, densaýlyq saqtaý, energetıka, kólik, aýyl sharýashylyǵy, sport jáne taǵy da basqa salalardaǵy yqpaldastyqty nyǵaıtýdy kózdeıtin birqatar ýaǵdalastyqqa qol jetkizdi.