Qazaqstan men Reseıdiń poshta qyzmetteri yntymaqtastyq týraly memorandýmǵa qol qoıdy

NUR-SULTAn. QazAqparat - Qazaqstannyń jáne Reseıdiń poshta qyzmetteri Qazposhtanyń «Qorǵas – Shyǵys qaqpasy» AEA» jáne «Jarkent» halyqaralyq poshta almasý ornyndaǵy bond qoımalary arqyly tranzıttik tasymal kólemin arttyrmaq, dep habarlaıdy «Qazposhta» AQ baspasóz qyzmeti.

Taraptar tyń logıstıkalyq sheshimder negizinde halyqaralyq poshta jóneltilimderin Eýropa jáne TMD elderine jetkizýdi ońtaılandyrýdy josparlap otyr. Bul óz kezeginde transshekaralyq elektrondyq kommertsııanyń damýyna oń yqpalyn tıgizedi.

Búgin «Qazposhta» AQ Basqarma tóraǵasy Qanat Alpysbaev jáne «Reseı poshtasy» AQ bas dırektory Maksım Akımov Peterbor halyqaralyq ekonomıkalyq forýmy aıasynda strategııalyq yntymaqtastyq týraly memorandýmǵa qol qoıdy. Qujat kórshiles elderdegi poshta qyzmetteriniń halyqaralyq poshta jóneltilimderin saqtaýǵa jáne tasymaldaýǵa baılanysty tranzıttik logıstıkalyq sheshimder salasyndaǵy yqpaldastyqty damytýǵa baǵyttalǵan.

«Biz úlken tranzıttik áleýetke jáne logıstıkalyq ınfraqurylymǵa ıemiz. Qolymyzdaǵy qordyń sınergııasy basymdyqqa ıe baǵyttarda yntymaqtastyqty keńeıtýge jol ashady. Onyń ishinde tranzıttik aǵyndardy arttyrýǵa, ońtaıly logıstıkalyq baǵdarlardy qoldanýǵa, e-commerce damýyna jańa serpin berýge múmkindik beredi. Qazposhta «Qorǵas – Shyǵys beketi» arnaıy ekonomıkalyq aımaǵynda jáne «Jarkent» halyqaralyq poshta almasý ornynda ornalasqan bond qoımalaryn damytýǵa basa nazar aýdaryp otyr. Bizdiń qýattylyqtardy barynsha maksımaldy deńgeıde qoldanamyz», - dep atap ótti «Qazposhta» AQ Basqarma tóraǵasy Qanat Alpysbaev.

Qazaqstandyq jáne reseılik poshta operatorlary birlese logıstıkalyq ónimderdi, onyń ishinde tranzıttik baǵdarlardy damytýǵa múddeli. Seriktester qoldanystaǵy Eýropadaǵy ınfraqurylym arqyly halyqaralyq poshta almasýdy jedeldetýdi josparlap otyr.

«Eýropadan, AQSh-tan jáne Qytaıdan keletin elektrondyq kommertsııanyń aǵyny artyp jatqanyn eskersek, EEO elderiniń poshta ákimshilikteri arasynda tıimdi logıstıka qurý asa mańyzdy. Qazposhtamen birlese jańa tıimdi baǵdarlardy qalyptastyryp, jóneltilimderdi jedel jáne qaýipsiz jetkizýdi jáne bizdiń elderimizdiń tranzıttik áleýetin iske asyrýǵa múmkindik beredi», - dep atap ótti «Pochta Rossıı» AQ bas dırektory Maksım Akımov.

Yntymaqtastyqtyń alǵashqy kezeńinde tranzıttiń kólemi boljam boıynsha bir aıda keminde 24 tonna quraıdy. Onyń kólemi keleshekte naryqtyń suranysyna baılanysty eselenedi.

2020 jyly Qazaqstannan Reseıge 380 myń jáne keri baǵytta 297 myńǵa jýyq halyqaralyq poshta jóneltilimi jetkizilgen. Qazaqstan aýmaǵy arqyly Qytaıdan Reseıge tranzıt kólemi 327 tonnadan asty. Búginde QR jáne RF arasyndaǵy poshta almasý áýe jáne jer ústi kólikteri arqyly júrgiziledi.