Qazaqstan men Reseıdegi benzınniń baǵasy teń bolyp qala bergen durys - Myńbaev
«Negizi, qosarlanǵan qun salyǵy men aktsız jaǵynan Qazaqstan men Reseıdegi benzın baǵasynda biraz aıyrmashylyq bolýy múmkin. Biraq qazir ol teń. Endi, eki eldiń arasynda 7 myń shaqyrymdyq shekara bar. Al eki jaqta benzın baǵasynyń eki bólek bolǵany kimge tıimdi? Mysaly, Reseıde benzınniń baǵasy bizden joǵary bolsa, onda shekaralas aımaqtar bizdiń janar-jaǵaraıymyzdy jappaı Reseıge tasymaldaı bastaıdy. Al bizde joǵary bolsa, onda reseılik benzındi osynda kóptep ákeledi. Ondaıda óz janar-jaǵarmaıymyz satylmaı qalady. Sondyqtan zaýyttardy jańǵyrtý jumystary bite me, joq pa, baǵa oǵan baılanysty emes. Oǵan qosa, biryńǵaı Eýrazııalyq ekonomıkalyq keńistikti quramyz dep jarııalaǵannan keıin satylatyn janar-jaǵarmaıdyń baǵasy eki memlekette teń bolýy tıis. Qazir de solaı. Bolashaqta da solaı», - dedi Myńbaev búgin Astanada ótken baspasóz máslıxatynda.
Osy oraıda kompanııa basshysy aldaǵy ýaqytta benzınniń baǵasy qymbattaı ma, joq pa, ony dóp basyp aıta almaıtynyn jetkizdi. Sebebi barlyǵy munaı salasyndaǵy baǵalarǵa, valıýta baǵamyna jáne taǵy basqa sebepterge baılanysty bolady. «Keıde munaıdyń baǵasy óskende benzınniń baǵasy sál arzandaıdy. Al munaı arzandasa, benzınniń baǵasy, kerisinshe, joǵarylaýy múmkin. Sosyn munaı men daıyn benzınniń arasynda salyq bar, valıýtalyq baǵanyń aıyrmashylyǵy bar. Teńge kúsheıse, benzınniń baǵasy tómendeýi tıis. Baǵam ósip ketse, onda benzınniń baǵasy da teńgemen sanalady, al teńgemen sanalǵan baǵa ósýi múmkin. Barlyǵy naryqqa baılanysty», - dep atap kórsetti Myńbaev.