Qazaqstan men Reseı zymyrandar ushatyn jańa alań týraly kelisimge keldi

NUR-SULTAN. QazAqparat - Qazaqstan Úkimeti «Soıýz-2» tasymaldaýshy zymyrandary ushatyn jańa alań týraly Reseı tarapymen jasalǵan kelisimdi maquldady, dep habarlaıdy «QazAqparat» HAA tilshisi QR Tsıfrlyq damý, qorǵanys jáne aeroǵarysh ónerkásibi mınıstrliginiń baspasóz qyzmetine silteme jasap.

Kelisim «Baıqońyr» ǵarysh aılaǵynan ushyrylǵan «Soıýz-2» zymyrandarynyń bólshekteri qulaıtyn Qostanaı oblysynyń aýmaǵyndaǵy jerdi Reseıdiń paıdalanýyn retteıdi.

Qujatty ázirleý barysynda aýqymdy zertteý jumystary júrgizilgen. Jurtshylyqtyń pikiri tyńdalǵan, qorshaǵan ortaǵa áserin baǵalaý boıynsha qujattama ázirlenip, QR Memlekettik ekologııa saraptamasynyń qorytyndysy alynǵan.

«Kelisim «Baıqońyr» ǵarysh aılaǵynan kommertsııalyq maqsattaǵy zymyrandardy kóbirek ushyrý múmkindigin beredi, bul «Baıqońyr» keshenine oń yqpalyn tıgizedi. Sonymen qatar atalǵan jer ýchaskesiniń paıdalanylýy jylyna úsh zymyran úshin 460 000 AQSh dollary mólsherinde aqy tóleý qarastyrylǵan. Ol qarajat Qostanaı oblysynyń Jangeldın aýdanynyń bıýdjetine jiberiledi», - deıdi QR tsıfrlyq damý, qorǵanys jáne aeroǵarysh ónerkásibi vıtse-mınıstri Marat Nurǵojın.

Vedomstvonyń málimdeýinshe, «Soıýz-2» tasymaldaýshy zymyrany ekologııaǵa qaýipsiz janarmaımen ushady. Kelisimniń sharttary boıynsha, ekologııalyq jaǵdaıdy tekserýge qazaqstandyq sarapshylar men uıymdar qatysady.

Avtor: Sara Qabıqyzy