Qazaqstan men Reseı Úkimetteriniń basshylary qandaı máselelerdi talqylady

SOChI. QazAqparat – Reseıdiń Sochı qalasynda Eýrazııalyq úkimetaralyq keńes jumysy aıasynda Qazaqstan Premer-Mınıstri Álıhan Smaıylov pen Reseı Úkimetiniń tóraǵasy Mıhaıl Mıshýstınniń kezdesýi ótti. QazAqparat bul týraly primeminister.kz saıtyna silteme jasap habarlaıdy.

Taraptar saýda-ekonomıkalyq yntymaqtastyq, ınvestıtsııalyq ózara is-qımyl, óndiristik kooperatsııa, perspektıvaly kólik dálizderi men logıstıkalyq ınfraqurylymdy damytý, energetıka, bilim berý, mádenı-gýmanıtarlyq salalarda birlesken jobalardy júzege asyrý máselelerin talqylady.

Premer-Mınıstr eki el basshylarynyń belsendi saıası dıalogy Qazaqstan-Reseı yntymaqtastyǵynyń barlyq spektri boıynsha joǵary dınamıkany qamtamasyz etetinin atap ótti. Osy rette QR men RF úkimetteriniń basty mindeti kelisimderdi joǵary deńgeıde tolyq kólemde júzege asyrý bolyp tabylady.

Álıhan Smaıylov Reseı – Qazaqstannyń negizgi saýda-ekonomıkalyq seriktesi ekenin atap ótti. Ótken jyldyń qorytyndysy boıynsha taýar aınalymy 6%-ǵa artqan. Al bıylǵy jyldyń birinshi toqsanynyń qorytyndysy boıynsha ózara saýda-sattyq taǵy 10% artty.

«Biz bul oń úrdistiń ári qaraı damýyn kútemiz», — dedi Úkimet basshysy.

Sondaı-aq ol elder arasyndaǵy ınvestıtsııalyq ózara is-qımyldyń joǵary deńgeıin atap ótti. Sońǵy 17 jylda Reseıden Qazaqstanǵa tikeleı ınvestıtsııa kólemi 20 mlrd dollarǵa jýyqtady. Al Reseıdegi qazaqstandyq ınvestıtsııa shamamen 6 mlrd dollardy qurady.

Álıhan Smaıylovtyń aıtýynsha, bul dınamıkaǵa ónerkásiptik kooperatsııa da yqpal etti. Atap aıtqanda, Qazaqstanda «Evrohım», «Lýkoıl», «EFKO», «Tatneft» jáne basqa da reseılik jetekshi kompanııalar tabysty jumys istep jatyr.

«Qazaqstandyq jáne reseılik kásiporyndar jańa ınnovatsııalyq óndiristik jobalardy júzege asyrýǵa daıyn. Buǵan byltyr qol qoıylǵan, 12,5 myńǵa jýyq jumys ornyn ashýǵa múmkindik beretin, jalpy quny 9 mlrd dollarǵa 29 jańa joba boıynsha birlesken is-qımyldar baǵdarlamasy dálel. Jalpy eki el arasynda quny 22 mlrd dollardan asatyn 100-den astam ónerkásiptik kooperatsııalyq joba bar. Jyl saıyn ondaǵan jańa jobalar qosylyp otyrady», — dedi Premer-Mınıstr.

Óz kezeginde Mıhaıl Mıshýstın Reseı men Qazaqstan arasyndaǵy qarym-qatynas kóp ǵasyrlyq dostyqqa negizdelgenin jáne ulttyq ekonomıkalardy damytýǵa, sondaı-aq eki el halqynyń ál-aýqatyn arttyrýǵa baǵyttalǵanyn atap ótti.

«Qazaqstanmen yntymaqtastyq biz úshin erekshe mańyzdy, men muny basty basym baǵyt der edim. Bizdiń saýda-ekonomıkalyq yntymaqtastyǵymyz tabysty damyp keledi. Byltyr ózara saýda-sattyq rekordtyq deńgeıge jetti. Búginde ónerkásip, mashına jasaý, energetıka jáne kólik ınfraqurylymynda jańa óndiristik tizbekterdi qurýdy jedeldetý mańyzdy. Buǵan Reseı men Qazaqstannyń ekonomıkalyq, óndiristik jáne tehnologııalyq áleýetteriniń ózara tolyqtyratyny jaqsy negiz bolyp tabylady», — dedi Mıhaıl Mıshýstın.