Qazaqstan men Reseı shekaralyq yntymaqtastyq baǵdarlamasy tujyrymyna qol qoıady

OMBY. QazAqparat – Ombyda ótip jatqan «Shekara mańy yntymaqtastyǵyn damytýdyń ózekti máseleleri» atty Qazaqstan men Reseı arasyndaǵy XVI óńiraralyq yntymaqtastyq forýmynda Prezıdent Qasym-Jomart Toqaev eki eldiń ekonomıka mınıstrlikteri Shekaralyq yntymaqtastyq baǵdarlamasy tujyrymyna qol qoıatynyn málim etti, dep habarlaıdy QazAqparat tilshisi.

Memleket basshysy baǵdarlamada eki eldiń 20 oblysy qamtylatynyn tilge tıek etti.

«Baǵdarlamany ázirlep, qabyldaýdy keshiktirýdiń qajeti joq dep sanaımyn. Bul baǵdarlamany, atap aıtqanda, jeke jobalardy qarjylandyrý quraldarymen qamtamasyz etý qajet. Biz ishki naryqty damytýǵa belsene qatysatyn Eýrazııalyq damý bankiniń áleýetin paıdalanýymyz kerek», - dedi Qazaqstan Prezıdenti.

Memleket basshysy shekaralas oblystardyń ınfraqurylymdyq áleýetin keńeıtý jáne damytý qajettigin erekshe atap ótti.

«Qazirgi ınfraqurylym zaman talabyna saı emes. Transulttyq dálizderdi, onyń ishinde «Bir beldeý - bir jol» jáne «Soltústik - Ońtústik» mega-jobalaryn eskere otyryp, shekaralyq ótkelderdi jańǵyrtý qajet. Búgingi tańda birqatar qosymsha ótkizý pýnktilerin keńeıtý jáne ashý qajettigi týyndady. Bizde Qytaımen mundaı tájirıbe bar. Ózbekstanmen osyǵan uqsas joba qarqyndy damyp keledi», - dedi Qasym-Jomart Toqaev.

Qazaqstan Prezıdenti bul joba aımaqtardaǵy ekonomıkalyq belsendiliktiń katalızatory bolyp qana qoımaı, sonymen birge tranzıttik jáne kóliktik áleýetti tolyǵymen iske asyra alatynyna senim bildirdi.

Eske sala ketsek, Prezıdent búgin «Shekara mańy yntymaqtastyǵyn damytýdyń ózekti máseleleri» atty Qazaqstan men Reseı arasyndaǵy XVI óńiraralyq yntymaqtastyq forýmyna qatysý úshin Ombyǵa ushyp kelgen bolatyn.