Qazaqstan men Reseı prezıdentteriniń málimdemesinde Kaspıı qubyry konsortsıýmy jumysynyń turaqtylyǵy ataldy

<p>ASTANA. KAZINFORM &ndash; Qazaqstan Prezıdenti Qasym-Jomart Toqaev pen Reseı prezıdenti Vladımır Pýtınniń málimdemesiniń mátini búgin Aqorda saıtynda jarııalandy. Kaspıı qubyry konsortsıýmy týraly pýnkt ekonomıkalyq yntymaqtastyq bóliminde jarııalanǵan.</p>

Reseı prezıdentiniń Qazaqstanǵa memlekettik saparynyń qorytyndysy boıynsha jasalǵan birlesken málimdeme jańa jahandyq tártip jaǵdaıynda strategııalyq áriptestikti tereńdetýge arnalǵan. Osy oraıda, qarym-qatynastyń negizgi baǵyttary málimdemeniń «saıası dıalog», «ekonomıkalyq yntymaqtastyq», «mádenı-gýmanıtarlyq baılanystar» bóliminde qamtylǵan. 

Atap aıtqanda, ekonomıkalyq yntymaqtastyq salasynda taraptar neǵurlym ádil, teńdestirilgen jáne ashyq halyqaralyq saýda júıesin qalyptastyrýǵa múddelilik tanytatynyn kelisti. Birjaqty shekteý sharalaryn qoldaný halyqaralyq saýda-ekonomıkalyq yntymaqtastyqqa jáne memleketterdiń turaqty damýyna teris áser etetinin, kópjaqty saýdanyń ashyq jáne kemsitilmeıtin júıesiniń jumys isteýine yqpal etpeıtinin rastady.

«Taraptar ulttyq valıýtalardaǵy ekijaqty tranzaktsııalar úlesiniń ulǵaıýyn qoldaıdy, bul uzaq merzimdi perspektıvada eki eldiń qarjylyq egemendigin nyǵaıtýǵa yqpal etedi», - delingen birlesken málimdemede. 

Sonymen qatar onda Eýrazııalyq ekonomıkalyq odaq aıasyndaǵy yntymaqtastyq máselesi qamtylǵan. Bul turǵyda taraptar EAEO ıntegratsııalyq áleýetin ashý jáne ulttyq ekonomıkalardyń básekege qabilettiligin arttyrý arqyly Odaq sheńberindegi ortaq naryqtardy odan ári damytýdyń mańyzdylyǵyn atap ótti. 

Budan bólek, málimdemede óńirdiń energetıkalyq qaýipsizdigine qatysty ekpin qoıylǵan. 

«Taraptar óńirdiń energetıkalyq qaýipsizdigi men turaqtylyǵyn qamtamasyz etýdegi, sondaı-aq elder arasyndaǵy ekonomıkalyq yntymaqtastyqty damytýdaǵy sheshýshi ról atqaratyn Kaspıı qubyr konsortsıýmynyń turaqty jumysyn atap ótedi», - dep atalyp ótken qujatta.

Osy arqyly elimizdiń munaıyn syrtqy shyǵaratyn Kaspıı qubyr konsortsıýmy júıesiniń toqtaýsyz jumys isteýine joǵary deńgeıde kepildik berilgen. 

Jaqynda Kazinform tilshisine bergen suhbatynda sarapshy Abzal Narymbetov Qazaqstannyń munaı eksportyna qatysty pikir aıtty. 

«Bizdiń eksporttyń 98%-y Reseı aýmaǵy arqyly ótedi. Eger bul marshrýttar boıynsha tranzıt toqtatylsa, Qazaqstan ekonomıkasy aýyr jaǵdaıǵa tap bolady», - deıdi ol.

Munymen qosa, birlesken málimdemede gaz salasyndaǵy, onyń ishinde gazdy úshinshi elderge tasymaldaý maqsatynda áriptestikti odan ári keńeıtýge múddelilik bar ekeni habarlanǵan. 

«Birlesken jobalardy iske asyrý Ortalyq Azııanyń óńirlik turaqtylyǵy men energetıkalyq qaýipsizdigin nyǵaıtady, Qazaqstan men Reseıdiń ónerkásiptik damýyna, bıznes-ahýaldy jaqsartýǵa, azamattardyń ómir súrý deńgeıin arttyrýǵa qýatty serpin beredi», - delingen málimdeme mátininde.

Budan buryn habarlanǵandaı, Memleket basshysy Qasym-Jomart Toqaevtyń shaqyrýymen 27 qarasha kúni elimizge Reseı Federatsııasynyń Prezıdenti Vladımır Pýtın memlekettik saparmen keldi. 

Sapar aıasynda joǵary deńgeıdegi kelissózder júrgizildi. Memleket basshylary Qazaqstan men Reseıdiń HH Óńiraralyq yntymaqtastyq forýmyna beınekonferentsııa rejımi arqyly qatysty. 

Sondaı-aq 28 qarasha kúni Qazaqstan Prezıdenti Qasym-Jomart Toqaevtyń tóraǵalyǵymen UQShU Ujymdyq qaýipsizdik keńesiniń kezekti sessııasy bastaldy. 

Jıynǵa Qazaqstan Prezıdenti Qasym-Jomart Toqaev, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon jáne Reseı Prezıdenti Vladımır Pýtın, UQShU bas hatshysy Imanǵalı Tasmaǵambetov qatysyp otyr. Jıynda aımaqtyq jáne halyqaralyq qaýipsizdiktiń negizgi máseleleri talqylanady.

Otyrys qorytyndysy boıynsha birqatar qujatqa qol qoıylady