Qazaqstan men Reseı órt sóndirýshileri birlesken jattyǵý ótkizip jatyr

ATYRAÝ. QazAqparat – Reseı Federatsııasynyń Astrahan oblysynda transshekaralyq órtterdi sóndirýge baılanysty Qazaqstan-Reseı qutqarýshylarynyń aýqymdy oqý-jattyǵýy ótip jatyr. Oǵan shekaradaǵy Atyraý men Astrahan oblystarynyń qutqarýshylary tartylǵan, dep habarlaıdy QazAqparat tilshisi.

Birlesken oqý-jattyǵýdyń maqsaty – shekaralas aýmaqqa qaýip tóndiretin iri tabıǵı órtterdi joıý kezindegi ózara is-qımyldy jetildirý.

«Eki eldiń shekaralas óńirlerindegi órt sóndirýshiler aldynda Astrahan oblysy Ahtýbın aýdanyndaǵy shartty órtti sóndirý mindeti tur. Óıtkeni, tabıǵı dala órti sol aýdandaǵy Tómengi Basqunshaq eldi mekeniniń, sondaı-aq «Bogdınsko-Basqunshaq» memlekettik qoryǵy men Qazaqstan Respýblıkasynyń aýmaǵyn qosa sharpyǵan. Órtte de kez kelgen tabıǵı apattar sekildi shekara joq. Sondyqtan, tabıǵı apattarǵa qarsy turý, ýaqytyly eńserý úshin osyndaı birlesken is-qımyldardy pysyqtaýdyń mańyzy zor», - deıdi Atyraý oblystyq tótenshe jaǵdaılar departamentiniń bastyǵy, azamattyq qorǵaý polkovnıgi Sábıt Bıtaev.

Birlesken oqý-jattyǵýlarǵa Reseı Federatsııasy Tótenshe jaǵdaılar mınıstrliginiń Astrahan oblysy boıynsha bas basqarmasy men Atyraý oblystyq tótenshe jaǵdaılar departamentiniń jeke quramynan 154 adam men 41 arnaıy tehnıka tartylǵan.

Eske sala ketelik, buǵan deıin Atyraýdan Reseı shekarasyna deıingi jol jóndelip jatqanyn habarlaǵan edik.