Qazaqstan men Reseı arasynda talas bolǵan 142 myń tonna munaıdyń taǵdyry sheshildi
Jalpy otyrysta mınıstr Qazaqstan men Reseı elderiniń Úkimetteri arasyndaǵy «Týımazy - Omby - Novosıbırsk-2» jáne «Omby - Pavlodar» magıstraldyq munaı qubyrlaryndaǵy tehnologııalyq munaıdyń mártebesin aıqyndaý týraly kelisimdi ratıfıkatsııalaýǵa baılanysty zań jobasyn tanystyrǵan bolatyn.
«KSRO kezinde elimizdiń magıstraldyq munaı jelisi biryńǵaı júıede bolatyn. Biraq, Keńes úkimeti taraǵannan keıin qubyrlar ár memlekettiń aýmaqtyq qaǵıdaty boıynsha bólinip ketken edi. Alaıda, «Týımazy - Omby - Novosıbırsk-2» munaı qubyrynyń Qazaqstan bóligindegi 62 048 tonna tehnologııalyq munaıdyń menshik quqyǵy aıqyndalmaı qalyp ketken. Sonymen qatar, «Omby - Pavlodar» munaı qubyrynyń Reseı ýchaskesinde 141 728 tonna tehnologııalyq munaıdyń menshigi de sheshilmegen edi», - dedi zań jobasyn tanystyrǵan Qanat Bozymbaev.
Degenmen, onyń aıtýynsha, atalǵan munaı aýmaqtyq qaǵıdatqa naqty tapsyrylmasa da Reseıdiń «Transneft» JAQ-y men Qazaqstannyń «Qaztransoıl» kompanııasynyń balansyna berilgen. ıAǵnı, «Omby - Pavlodar» munaı qubyrynyń Reseı ýchaskesindegi 141 728 tonna munaı shyn máninde «Qaztransoıl» AQ-nyń balasynda, al «TON-2» munaı qubyrynyń Qazaqstan aýmaǵyndaǵy 62 048 munaı «Transneft» JAQ qaramaǵynda bolǵan.
«Aıta ketý kerek, 2017 jyldyń 9 qarashasynda jasalǵan Qazaqstan men Reseı Úkimetiniń arasyndaǵy «TON-2» men «Omby - Pavlodar» magıstraldyq munaı qubyryndaǵy tehnologııalyq munaıdyń mártebesin aıqyndaý týraly kelisim eki el arasyndaǵy kóp jyldyq yntymaqtyń nátıjesi. Tehnologııalyq munaıdy qaıtarýda rásimderdi jeńildetý maqsatynda atalǵan kelisimmen birinshi, Qazaqstan aýmaǵynda ornalasqan «TON-2» magıstraldyq munaı qubyryndaǵy 62 048 tonna munaı «Qaztransoıl» AQ-yna tıesili. Ekinshisi, onyń ornyna Reseı ýchaskesinde ornalasqan «Omby - Pavlodar» qubyryndaǵy munaıdyń dál sondaı 62 048 tonnasy «Transneft» JAQ-tyń enshiles kompanııasy «Transneftýral» AQ-yna tıesili. Úshinshi, reseılik ýchaskedegi «Omby - Pavlodar» magıstraldyq qubyryndaǵy munaıdyń 79 880 tonnasy «Qaztransoıl» kompanııasyna tıesili bolyp bekitilgen. Sonymen qatar, kelisim kúshinen engen kúnnen bastap eki tarap on aı ishinde «Qaztransoıl» AQ-yna tıesili osy 79 880 tonna munaıdy «Omby - Pavlodar» qubyry arqyly Reseı aýmaǵynan Qazaqstanǵa birneshe partııamen jóneltýi qajet»,- dedi ol.
Mınıstrdiń atap ótýinshe, bul kelisim qubyrlardaǵy munaı atalǵan uıymdarǵa tıesili ekendigin zańdy túrde aıqyndaıdy. Sondaı-aq, munaıdy menshik ıelerine tapsyrýdaǵy qajetti azamattyq-quqyqtyq jáne uıymdastyrý rásimderin jeńildetýge múmkindik berip otyr.
«QR-nyń qoldanystaǵy Salyq kodeksine sáıkes munaıdy tapsyrý rásimine korporatıvtik tabys jáne qosylǵan qun salyqtary, sonymen qatar ózge de salyqtar salynýy tıis. Alaıda, kelisimniń 4 babymen «Qaztransoıl» kompanııasy atalǵan salyqtardan bosatylǵan. Sebebi bul operatsııa múlikti satyp alý mámilesi bolyp tabylmaıdy. Kelisimdi ratıfıkatsııalaý jáne iske asyrý buryn talas bolyp kelgen 141 728 myń tonna tehnologııalyq munaıǵa «Qaztransoıl» AQ-nyń zańdy ıe bolýyna múmkindik beredi. Bul óz kezeginde elimizdiń ekonomıkasyna qosymsha paıda ákeledi»,- dedi ol.
Onyń sózine qaraǵanda, qazirgi kúni tehnologııalyq munaı jer qoınaýyn paıdalanýshylarǵa qaıtarylmaıdy. Olar atalǵan munaıdy Qazaqstannyń munaı óndirý zaýyttaryna jáne eksportqa jetkizýge múmkindik alady. Bul rette munaıdyń kommertsııalyq aınalymynan zaýyttardy jikteýden basqa QR zańnamasyna sáıkes bıýdjetke tıisti tólemder tólenetin bolady.
Aıta keterligi, Senat depýtattary Zańdy qoldap daýys berdi.