Qazaqstan men Reseı Altaı aımaǵyndaǵy shekara máselesi boıynsha sheshim qabyldaıdy

<p>ASTANA. KAZINFORM &ndash; Reseıde úkimet músheleri Altaı aımaǵyndaǵy Qazaqstan men Reseı arasyndaǵy shekaraǵa baılanysty sheshilmegen máseleni talqylady, dep habarlaıdy Reseı Prezıdentiniń resmı saıty.</p>

RF úkimetiniń jıynynda Reseıdiń Ekonomıkalyq damý mınıstri Maksım Reshetnıkov sóz sóıledi.

«Bizde ázirge Qazaqstanmen arada sheshilmegen bir másele bar. Ol – Muztaý taýy. Bizge halyqaralyq quqyqtyq kelisimge qol qoıý kerek. Sebebi ol taýǵa shyǵý úshin Qazaqstan aýmaǵynan ótý kerek, al ol jaqta shekara rejımi jumys isteıdi. Bizdiń aımaq ta erekshe baqylaýda. Biz qazir bul máseleni qazaqstandyq áriptestermen pysyqtap jatyrmyz»,-dedi mınıstr.

Maksım Reshetnıkov Altaıda týrızm jaqsy damyp kele jatqanyn jetkizdi.

«Altaı, Taýly Altaı bıyl erekshe jaqsy nátıje kórsetti, oǵan jyl boıyna jumys isteıtin «Manjerok» taý-shańǵy kýrorty jaqsy áser etti. Sonymen qatar Altaı ólkesinde «Bırıýzovyı katýn» degen ataýmen belgili erekshe ekonomıkalyq aımaq bar. Onda kóptegen nysandar oryn tepken. Qazir áýejaı damytylýda. Bul bizdiń elimizdiń kartasyndaǵy jańa ári óte myqty núkte. Jalpy, Altaı burynnan tartymdy bolatyn, endi ol jaqqa jaıly jaǵdaı jasalyp, erekshe qarqynmen damyp keledi»,-dedi mınıstr.

Reseı prezıdenti Vladımır Pýtın shekaradaǵy máseleni jetildirý kerek ekenin jáne oǵan syrtqy ister mınıstrliginiń quzyryn da paıdalanǵan jón ekendigin jetkizdi.

Muztaý Altaı taýlary men Sibirdiń eń joǵarǵy núktesi. Ol Shyǵys Qazaqstan oblysy men Altaı Respýblıkasynyń Ýst-Koksınskıı aýdanynyń aýmaǵynda jatyr.