Qazaqstan men Polsha ózara saýda-ekonomıkalyq is-qımyldy tereńdetpek

NUR-SULTAN. QazAqparat - Qazaqstan men Polsha saýda-ekonomıkalyq jáne ınvestıtsııalyq ózara is-qımyldy tereńdetýdi kózdep otyr. Bul týraly Qazaqstan men Polsha arasyndaǵy dıplomatııalyq qarym-qatynastardyń 30 jyldyǵyna oraı ótken eki eldiń Syrtqy ister mınıstrleriniń kezdesýinen málim boldy, dep habarlaıdy QazAqparat.

QR Syrtqy ister mınıstrligi taratqan derekterge qaraǵanda, Polsha – Qazaqstannyń Eýropalyq odaq elderi arasyndaǵy segizinshi eń iri saýda áriptesi. 2021 jyly eki el arasyndaǵy taýar aınalymynyń kólemi 760,4 mln AQSh dollaryn, al 2005-2021 jyldar aralyǵynda Polshadan Qazaqstan ekonomıkasyna tartylǵan tikeleı ınvestıtsııalardyń kólemi 272,6 mln AQSh dollaryn qurady.

Memleketter arasynda energetıka, «jasyl tehnologııalar», kólik jáne logıstıka, elektrondyq saýda, qarjy tehnologııalary, týrızm, agroónerkásip kesheni sııaqty salalarda birlesken perspektıvalyq jobalardy damytýdyń da úlken áleýeti bar.

«Qos el bir-birinen myńdaǵan shaqyrym alys bolǵanyna qaramastan, olardy ortaq tarıhı taǵdyr baılanystyrady. Qazaqstan halqyn quraıtyn 130 etnostyń arasynda polıak dıasporasy da bar. Qazaqstandyq «Polonııa» búginde elderimiz arasyndaǵy «jandy kópir» bolyp tabylady. Polıak dıasporasy úshin elimizde ana tilin, tarıhyn, mádenıetin, dástúrin oqyp-úırenýge jáne tarıhı otanymen rýhanı jaqyndasýǵa qajetti barlyq jaǵdaı jasalǵan. Sonymen qatar, «Polonııa» ókilderi elimizdiń saıası jáne áleýmettik-ekonomıkalyq ómirine belsendi qatysyp keledi»,-delingen habarlamada.

Kezdesý barysynda eki memleket pen halyqtar arasynda ózara tıimdi yqpaldastyq pen dostyqtyń aldaǵy ýaqytta da qaryshty damýyna ortaq senim bildirildi.