Qazaqstan men Pákistan ózara tıimdi yntymaqtastyqty odan ári damytýǵa múddeli - SІM

NUR-SULTAN. QazAqparat – Islam yntymaqtastyǵy uıymy Syrtqy ister mınıstrleri keńesiniń 48-shi sessııasyna qatysý aıasynda Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi Pákistan Islam Respýblıkasy Úkimetiniń basshylyǵymen jekelegen kezdesýler ótkizdi, dep habarlaıdy QR SІM baspasóz qyzmeti.

Pákistannyń Premer-Mınıstri Imran Hanmen kezdesýde elderimiz arasyndaǵy saýda-ekonomıkalyq jáne ınvestıtsııalyq yntymaqtastyqty keńeıtý máseleleri talqylandy. Pákistan úkimetiniń basshysy Ortalyq Azııa elderimen ózara is-qımyl Pákistannyń syrtqy saıasatynyń basym baǵyttarynyń biri ekenin atap ótti.

Parlament Senatynyń Tóraǵasy Sadık Sandjranımen kezdesýde parlamenttik dıplomatııany jandandyrý qajettigi basa aıtyldy. Sapar almasý kestesi men parlamentaralyq yntymaqtastyqtyń jańa túrleri talqylandy.

PIR Syrtqy ister mınıstri Mahmýd Kýreshımen kelissózder barysynda M.Tileýberdi áriptesin Pákistannyń Ulttyq kúnimen jáne eki el arasyndaǵy dıplomatııalyq qarym-qatynastardyń ornaǵanyna 30 jyl tolýymen quttyqtady. Taraptar joǵary jáne asa joǵary deńgeıdegi is-sharalar kestesin, sondaı-aq ekijaqty qarym-qatynastardy odan ári damytý perspektıvalaryn talqylady.

Sapar barysynda Mınıstr M.Tileýberdi jáne IYU Syrtqy ister mınıstrleri keńesiniń basqa da delegatsııa basshylary PIR Prezıdenti doktor Arıf Alvımen ujymdyq kezdesýge jáne Pákistan Islam Respýblıkasy Táýelsizdik kúniniń 75 jyldyǵyna arnalǵan áskerı paradqa qatysty.