Qazaqstan men Ózbekstannyń kóne qalalaryn kórsetetin týrıstik marshrýt ashyldy
Atap aıtqanda, týrıster biregeı tarıhı jádigerler saqtalǵan Nur-Sultan, Almaty, Túrkistan, Otyrar, Taraz, Shymkent, Tashkent, Samarqan, Buqara, Hıýa sııaqty qalalardy aralaıtyn bolady.
Bul joba qos eldiń týrıstik múmkindigin arttyrýǵa, atalǵan aımaqtarǵa ınvestıtsııa tartýǵa kózdelgen.
Atalǵan marshrýt Reseıdegi «Altyn saqına» sııaqty jobanyń balamasy bolmaq.
«Menińshe jylyna 20 mln týrıst tartyp jatqan «Altyn saqınanyń» Orta Azııadaǵy balamasy shyqty», - dedi «Ózbekstan» týrıstik brendiniń qurmetti elshisi Lázzat Ahanova.
Osy marshrýt boıynsha shaǵyn qonaq úıler, kóńil kóterý oryndaryn salý kerek. Alaıda, bul suraqtardyń barlyǵy úkimetaralyq deńgeıde sheshilýi tıis.
Ózbekstan Respýblıkasynyń Qazaqstandaǵy tótenshe jáne ókiletti elshisi Saıdıkram Nııazhodjaevtyń aıtýynsha, eki el basshylary arasynda ornyqqan senimdi qatynas arqasynda qos elge baratyn týrıster sany birneshe ese artqan.
Ózbekstanda qazir 86 elmen vızasyz qatynas ornatylǵan.
«Terrıtorııamyzda tarıhı jáne mádenı eskertkishterimiz óte kóp. Osy múmkindikti paıdalanyp, sheteldikterdi bizdiń mádenıetimizben tanystyrý kerek», - dedi ol.
Osy joba aıasynda musylmandar arasynda kishi qajylyq sııaqty kıeli týrızm, medıtsınalyq týrızm, ekotýrızm, óndiristik týrızm, art týrızm damytý kózdelgen.
Sonymen qatar elshiniń aıtýynsha, Shymkentten Tashkentke deıin temirjol salý kózdelip otyr.
«Ózbekstan jaǵynan bul másele sheshimin tapty. Júrdek jol Shymkent-Tashkent, Tashkent-Samarqan baǵytynda bolmaq. Sonymen qatar, Qyzylorda men Naýaı arasynda avtomobıl jáne temir jol salýdy usynyp otyrmyz»- dedi S.Nızıahodjaev.
«Altyn sharshy» týrlary bıyl testilik jobadan soń satyla bastaıdy.
Ózbekstan Respýblıkasynyń Qazaqstandaǵy bas konsýly Abror Fathýllaevtyń aıtýynsha, týrısterdiń aǵynyna yńǵaıly bolý úshin Shengen vızasyna balama - Silk Visa engiziletin bolady. Bul vızaǵa keıin basqa elder de qosylatyn bolady.