Qazaqstan men Ózbekstan «Jibek joly» vızasyn qoldanysqa engizedi
Bul týraly Tashkentte ótken «Jibek jolyndaǵy týrızm» atty halyqaralyq kórmede aıtyldy. Osymen 24-shi ret uıymdastyrylyp otyrǵan jármeńkege bıyl Qazaqstanmen qatar Taıland, Egıpet, Sıngapýr, Malaızııa, Úndistan, Koreıa, Túrkııa jáne Qytaı kompanııalary qatysyp jatyr.
Kórmege kelýshiler qolóner sheberleriniń buıymdaryn kórip, «Shyǵys bazarynan» bazarlyq alyp tarqasty. Sondaı-aq jármeńke aıasynda týrıstik kompanııalar ózara tájirıbe almasyp, bolashaqta birigip qyzmet kórsetýdiń joldaryn talqylady.
«Qazir qos tarap osy másele boıynsha belsendi jumys júrgizip jatyr. Sonymen birge bul jobaǵa «Jibek joly» boıynda ornalasqan ózge de memleketter qyzyǵýshylyq tanytyp otyr. Bolashaqta olar da osy vıza júıesine qosylatynyna senimdimiz. Bul, árıne, óz kezeginde bizdiń shekarashylarymyz ben qaýipsizdik qyzmetteriniń tyǵyz baılanysta jumys isteýine múmkindik beredi. Bul bir jaǵynan týrısterge jaǵdaı jasaýmen qatar olardyń qaýipsizdigine kepil bolady»,- deıdi Ózbekstan Premer-mınıstriniń orynbasary Azız Abdýhakımov.
«Bul vızalyq rejım jýyq arada qoldanysqa enetin bolsa, onda bul týrısterge bir memleketten ekinshi memleketke ońaı ótýine múmkindik beredi. Árıne, Ortalyq Azııa elderine saıahattap kelgen sheteldik týrıster Qazaqstanmen qatar Ózbekstan, Qyrǵyzstan jáne Tájikstan elderin kórgisi keledi. Sondyqtan «Jibek joly» vızasy sol týrıster úshin jańa elderge jol ashady»,- dep atap ótti QR Mádenıet jáne sport mınıstrligi Týrızm ındýstrııasy komıtetiniń tóraıymy Maınur Myrzamadıeva.