Qazaqstan men Ózbekstan Ulttyq ulanynyń sarbazdary birlesken jattyǵýlar ótkizbek
Baýyrlas respýblıkanyń áskerı delegatsııasy Qazaqstan Respýblıkasy Ulttyq ulanynyń Joǵary qolbasshylyǵynda boldy. Olardyń Qazaqstan Respýblıkasy Ulttyq ulanynyń basshylyǵymen kezdesýi kezinde brıfıng uıymdastyrylyp, onda Ulttyq ulannyń Bas qolbasshysy general-leıtenant Rýslan Jaqsylyqov qonaqtarǵa qurylym týraly, atqarylǵan mindetteri men áskerdiń damý perspektıvalary jaıly egjeı-tegjeıli aıtyp berdi.
Sonymen qatar, qoǵamdyq qaýipsizdik pen quqyqtyq tártipti qamtamasyz etý salasynda birlesken jattyǵýlar (trenıngter) ótkizý, qos tarap uıymdastyrǵan sporttyq jarystarǵa eki jaq vedomstvolary ókilderiniń qatysýy sııaqty máseleler qaraldy.
Kezdesýde delegatsııa basshysy general-maıor Rýstam Djýraev qazaq-ózbek qatynastary tereń tarıhı tamyry men ortaq rýhanı qundylyqtary bar bizdiń halyqtarymyzdyń dostyǵy men baýyrlastyǵynan kúsh alatyndyǵyn atap ótti.
Elordadaǵy issapar barysynda ózbekstandyq áskerıler Qazaqstan Respýblıkasy Ulttyq ulanynyń astanalyq jedel brıgadasynda boldy. Qonaqtarǵa áskerı qalashyqtyń ınfraqurylymy, áskerı tehnıkasy men qarý-jaraq úlgileri, sondaı-aq basqa da nysandar kórsetildi.
Delegatsııanyń jumys sapary ońtústik astanada aıaqtaldy. Onda Ózbekstannan kelgen áskerıler Іshki ister mınıstrligi men Ulttyq ulan arnaıy jasaqtarynyń Jaýyngerlik-ádistemelik daıarlaý ortalyǵynyń múmkindikterimen tanysty.
Sapar barysynda Qazaqstan Respýblıkasy Ulttyq ulanynyń Áskerı ınstıtýty men Ózbekstan Respýblıkasy Ulttyq ulanynyń Áskerı-tehnıkalyq ınstıtýty arasynda Yntymaqtastyq Memorandýmyn jasaý máselesi de pysyqtaldy.