Qazaqstan men Ózbekstan tranzıttik tasymaldaýlarǵa jeńildikter jasaýǵa ýaǵdalasty

ASTANA. QazAqparat - Tashkentte alda ótetin Qazaqstan men Ózbekstan arasyndaǵy ekijaqty yntymaqtastyq jónindegi Birlesken úkimetaralyq komıssııanyń 16-otyrysy aıasynda «Qazaqstan temir joly» UK» AQ prezıdenti Qanat Alpysbaev «Ýzbekıston temır ıýlları» AQ basshylyǵymen temirjol kóligi salasyndaǵy ózara iskerlik baılanysty damytý týraly kelissóz ótkizdi.

«Qazaqstan temir joly» UK» AQ baspasóz qyzmetinen málim etkendeı, 2016 jyly Qazaqstan men Ózbekstan arasynda temirjol kóligimen júk tasymaldaýda ósim baıqaldy. Tasymaldaý kólemi 19 mıllıon tonnany qurady.

Kezdesýde eki el aýmaǵymen tranzıttik tasymaldaý kólemin arttyrý men jeńildikti tarıfti qoldaný jaıy talqylandy.

Kelissózder nátıjesinde Qazaqstannan astyq jáne un ónimderiniń, 45-fýttyq refrıjeratorlyq konteınerlermen júkterdiń eksporty, sondaı-aq Qazaqstan aýmaǵy arqyly ózbekstandyq jemis-jıdekterdiń jáne basqa da azyq-túlik ónimderiniń tranzıti boıynsha tarıfterge jeńildikter usyný týraly kelisildi.

Kelisim barysynda ózbekstandyq eksport pen ımporttyq tasymaldaýlardy Aqtaý jáne Quryq porty arqyly Transkaspıı halyqaralyq kólik baǵdary (THKB) boıynsha uıymdastyrý múmkindigi talqylandy.

Tashkentte «QTJ-Júk tasymaly» AQ men «Ýzbekıston temır ıýlları» AQ arasynda Qazaqstan aýmaǵy arqyly júkterdi tasymaldaýdyń elektrondyq kommertsııalyq ilespe qujattary boıynsha aqparat almasýy týraly Kelisimge qol qoıyldy.