Qazaqstan men Ózbekstan temirjol qatynasyn qalpyna keltiredi

TAShKENT. QazAqparat – Kólik máseleleri jónindegi Ózbekstan-Qazaqstan jumys toby otyrysynyń aıasynda Qazaqstannyń ındýstrııa jáne ınfraqurylymdyq damý mınıstriniń orynbasary B. Kamalıev pen Ózbekstannyń kólik mınıstriniń orynbasary A. Mýmınov kezdesti, dep habarlaıdy QazAqparattyń menshikti tilshisi.

Ózbekstannyń Kólik mınıstrliginiń derekterine saı, koronavırýs pandemııasyna baılanysty toqtatylǵan temirjol jáne avtobýs qatynasyn jaqyn arada qalpyna keltirý máselesi talqylandy.

«Taraptar epıdemıologııalyq talaptardyń jeńildetilýi men kólikpen jolaýshylardy tasymaldaý protsesin qalpyna keltirýdiń mańyzyn rastady», - dep habarlady vedomstvodan.

Eske sala keteıik, eki el arasyndaǵy kólik qatynasy 2020 jyldyń naýryzynda koronavırýsqa qatysty karantındik shekteýler aıasynda toqtatylǵan bolatyn.