Qazaqstan men Ózbekstan sý tasqynynan búlingen shekaradaǵy baǵanalardy jóndeýde

GÚLSTAN. QazAqparat - 12-17 qarasha aralyǵynda Gúlstan Ózbekstannyń Gúlstan qalasynda Qazaqstan-Ózbekstan birlesken demarkatsııalyq komıssııasyndaǵy Qazaqstan jáne Ózbekstannyń Úkimettik delegatsııalarynyń otyrysy ótti, dep habarlaıdy QazAqparat.

QR Syrtqy ister mınıstrliginen málim etkendeı, komıssııa Ózbekstan Respýblıkasyndaǵy Qaraqalpaqstanmen shektes Qazaqstan Respýblıkasynyń Mańǵystaý oblysy shegindegi ýchaskege memlekettik shekarany demarkatsııalaýdyń qorytyndy qujattarynyń jobalaryn daıyndaýdy jalǵastyrdy.

Komıssııa músheleri 2020 jylǵy mamyrda Sardoba sý qoımasy bógetiniń buzylýy sebebinen búlingen shekaralyq baǵanalardy qalpyna keltirý maqsatynda Ózbekstannyń Syrdarııa jáne Jızaq oblystarymen shektes Qazaqstan Respýblıkasynyń Túrkistan oblysy shegindegi memlekettik shekaranyń jekelegen ýchaskelerine dalalyq zertteý júrgizdi.

«Kelissózder dostyq jáne syndarly jaǵdaıynda ótti. Kelesi otyrys Qazaqstan Respýblıkasynda 2020 jyldyń jeltoqsan aıynda josparlanǵan», - delingen SІM aqparatynda.

Eske sala keteıik, 2 mamyrda Ózbekstanda Sardoba sý qoımasynyń bógeti jarylyp, bir kúnniń ishinde Qazaqstannyń Túrkistan oblysynda 4 aýyldy sý basty, 620 úı búlindi. Maqtaral aýdanynda 2 mamyrda tótenshe jaǵdaı jarııalandy.