Qazaqstan men Ózbekstan Syrtqy ister mınıstrleri keńesin qurdy
«Ǵylym-bilim salasyndaǵy yntymaqtastyqqa jeke toqtaldyq. Jastardy jaqyndata túsetin mańyzdy bastamalardy talqyladyq. Jyl saıyn eki el jastarynyń kongresin ótkizý dástúrge aınalǵan. Qazir Qazaqstanda Ózbekstannan kelgen 6 myńǵa jýyq stýdent oqyp jatyr. Qazaq jastary da Ózbekstannyń joǵary oqý oryndarynda bilim alyp júr. Búgin Ózbekstannyń Shyrshyq qalasynda M.Áýezov atyndaǵy Ońtústik Qazaqstan ýnıversıtetiniń fılıaly ashyldy. Almatyda Tashkent ırrıgatsııa jáne aýyl sharýashylyǵyn mehanıkalandyrý ınjenerleri ınstıtýtynyń fılıaly óz jumysyn bastady. Jańa biz osy oqý oryndaryn saltanatty túrde ashtyq. Munyń bári baýyrlas eki halyqtyń ortaq múddesi úshin jasalyp jatyr», - dedi Prezıdent.
Sondaı-aq, Memleket basshysy aımaqtaǵy qaýipsizdikti jáne turaqtylyqty qamtamasyz etý jóninde pikir almasqandyqtaryn basa aıtty.
«Qazir ózekti bolyp turǵan halyqaralyq máseleler boıynsha ustanymdarymyz uqsas. Aımaqtaǵy yqpaldastyqty kúsheıtýge eki tarap ta múddeli. Biz erteń Ortalyq Azııa memleketteri basshylarynyń kezekti 6-shy konsýltatıvtik kezdesýine qatysamyz. Halyqaralyq kún tártibindegi ózekti máselelerge qatysty ustanymdarymyzdy úılestirý úshin biz búgin Syrtqy ister mınıstrleri keńesin qurdyq. Bul qadam eki eldi jaqyndastyra túseri sózsiz», - dedi Qasym-Jomart Toqaev.