Qazaqstan men Ózbekstan shekarasy ýaqytsha jabyldy

ASTANA. QazAqparat - 2016 jyldyń 23 maýsymynda Ózbekstan Respýblıkasy Zangıota baǵytyndaǵy shekaralyq ókildiginen QR Ulttyq qaýipsizdik komıteti Shekara qyzmetiniń 2020 áskerı bóliminiń atyna qyzmettik hat kelip tústi. Onda atalǵan baǵytpen azamattardy ótkizýge ýaqytsha shekteý engiziletini habarlanǵan.

«Taraptardyń Memlekettik shekaradaǵy ótkizý beketterinen  azamattardy ótkizý máseleleri boıynsha ózara árekettestik aıasynda, 2016 jyldyń 22 tamyzynan 2016 jyldyń 4 qyrkúıegine deıingi aralyqta ózbek-qazaq shekarasynyń avtojolyndaǵy ótkizý beketinen tulǵalardy ótkizýge ýaqytsha shekteý engiziletinin habarlaımyz», - delingen qujatta.

QR UQK Shekara qyzmetiniń baspasóz qyzmetinen habarlanǵanyndaı memlekettik shekaranyń ótkizý beketterinen mynadaı tártipter boıynsha ótkizýge shekteý bolmaıdy: dıplomatııalyq ókildikter men halyqaralyq uıymdar qyzmetkerlerine; resmı delegatsııa quramynda júrgen tarap azamattaryna; otanyna qaıtyp kele jatqan tarap azamattaryna; jedelhattar men shaqyrtýlary (týystarynyń aýyrýyna baılanysty, ólim-jitim sharalaryna qatysýǵa) jáne ekinshi taraptyń áýejaıynan ushý úshin avıabıletteri bar azamattarǵa; bir memlekettiń aýmaǵynda ornalasqan ekinshi memlekettiń obektilerinde qyzmet isteıtin azamattarǵa; halyqaralyq avtokóliktik júk tasymalyn júzege asyratyn tarap azamattarynyń júrgizýshilerine.