Qazaqstan men Ózbekstan shekarasynan jeke kýálikpen ótý tártibi engizilmek — Shavkat Mırzıeev

<p>TAShKENT. KAZINFORM&nbsp;&mdash; Ózbekstan Qazaqstan men Tájikstan shekarasynan ID-kartamen ótý tártibin engizýdi josparlap otyr. Bul týraly Olıı Majlıstiń Zań shyǵarý palatasy depýtattarynyń aldynda sóz sóılegen Ózbekstan prezıdenti Shavkat Mırzıeev málimdedi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń menshikti tilshisi.</p>

«Qazirgi ýaqytta bizdiń azamattar Qyrǵyzstanǵa ID-kartamen (jeke kýálik — avt.) erkin bara alady. Endi osyndaı tártipti Qazaqstan jáne Tájikstanmen shekaralarda engizý josparlanyp otyr», — dedi Shavkat Mırzıeev.

Ózbekstan basshysy atap ótkendeı, Ortalyq Azııa memleketteri arasyndaǵy tatý kórshilik qarym-qatynasty nyǵaıtý, óńirlik qaýipsizdik pen turaqtylyqty qamtamasyz etý syrtqy saıasattyń basym baǵyty bolyp qala bermek.

«Kelesi jyly elimizde ótetin „Ortalyq Azııa bestiginiń“ kezdesýi osy baılanystardy nyǵaıtýǵa baǵyttalǵan úlken qadam bolmaq», — dep toqtaldy Ózbekstan prezıdenti.

Eske salsaq, keshe Ózbekstan úkimeti otstavkaǵa ketti. Búgin Shavkat Mırzıeev jańa premer-mınıstrdiń kandıdatýrasyn depýtattarǵa usynyp jatyr.

Olıı Majlıs depýtattary saılanǵannan keıin premer-mınıstr men mınıstrler jańa saılanǵan parlament aldynda óz ókilettigin toqtatady. Tıisinshe bul qalypty protsedýra jańa depýtattardyń kómegimen úkimet quramyn jasaqtaýǵa baǵyttalǵan.