Qazaqstan men Ózbekstan senatorlary Aral máselesin talqylady

SAMARQAND. QazAqparat - Qazaqstan Parlamenti Senatynyń spıkeri Máýlen Áshimbaev Ózbekstan Olıı Májilisi Senatynyń Tóraǵasy Tanzıla Narbaevamen birge eki el parlamentteri palatalary arasyndaǵy yntymaqtastyq jónindegi komıssııanyń úshinshi otyrysyna qatysty, dep habarlaıdy QazAqparat menshikti tilshisi.

Komıssııanyń jumysyn asha otyryp, Máýlen Áshimbaev qazirgi kezeńde Qazaqstan men Ózbekstan arasyndaǵy syndarly jáne senimdi dıalog qurǵanyn atap ótti.

«Búginde bizdiń kóshbasshylarymyz yntymaqtastyq pen ózara is-qımyldyń úlgisin kórsetip otyr. Qazaqstan Prezıdenti Qasym-Jomart Toqaev Memleket basshysy retindegi alǵashqy saparyn baýyrlas Ózbekstanǵa jasady. Sonymen qatar, Ózbekstan Respýblıkasynyń Prezıdenti Shavkat Mırzıeevtiń 2021 jylǵy jeltoqsandaǵy Memlekettik saparynyń qorytyndysy boıynsha bizdiń áriptestigimiz odaqtas qatynas deńgeıine kóterildi. Bizdiń Palatalar arasyndaǵy yntymaqtastyq jónindegi komıssııa belsendi jumys istep jatyr. Komıssııanyń eki teń tóraǵasynyń belsendi jumysyn atap ótkim keledi», - dedi Máýlen Áshimbaev.

Senatorlardyń talqylaıtyn negizgi máselelerdiń biri - Aral teńizi apatynyń saldaryn joıý boıynsha ózara is-qımyl perspektıvalary.

«Araldyń qurǵaýyn BUU jáne búkil álemdik qoǵamdastyq qazirgi zamannyń jahandyq ekologııalyq problemalarynyń biri dep tanydy. Qazaqstan men Ózbekstan Aral óńirindegi jaǵdaıdy edáýir dárejede turaqtandyrýǵa múmkindik beretin tıisti sharalardy jáne jobalardy iske asyryp jatyr. Búgin komıssııa otyrysynda bizdiń depýtat áriptesterimiz osy ótkir ekologııalyq problemany sheshý úshin parlamentter tarapynan birlesken jumys boıynsha odan ári usynystar men ıdeıalar kóteretinine senimdimin»,-dedi Máýlen Áshimbaev.

Sondaı-aq, otyrys barysynda senatorlar óńiraralyq jáne shekara mańy yntymaqtastyǵyn damytý, sondaı-aq eki el qalalarynyń baılanysyn nyǵaıtý máselelerin talqylady.