Qazaqstan men Ózbekstan «Ortalyq Azııa» saýda ortalyǵyn ashady

NUR-SULTAN. QazAqparat – Qazaqstan men Ózbekstan «Ortalyq Azııa» saýda ortalyǵyn ashpaq. Bul týraly QR Saýda jáne ıntegratsııa vıtse-mınıstri Qaırat Tórebaev málim etti, dep habarlaıdy QazAqparat tilshisi.

OKQ-da ótken baspasóz máslıhatynda vıtse-mınıstr atap ótkendeı, Ortalyq Azııada Qazaqstannyń negizgi strategııalyq seriktesi – Ózbekstan. Qazaqstan qazirgi tańda Ózbekstanǵa quny 210 mln dollarlyq 70 taýar túrin shyǵara alady.

«Ózbekstanmen yntymaqtastyq aıasynda «Ortalyq Azııa» halyqaralyq ekonomıkalyq yntymaqtastyq saýda ortalyǵy jobasyn júzege asyrý josparlanyp otyr. Merzim boıynsha ázirge kelissózder júrgizilip jatyr. Biz birneshe ret kelissóz júrgizip, osy halyqaralyq ortalyq ornalasady-aý degen 5 oryndy tańdap aldyq. Halyqaralyq ortalyq Qazaqstan men Ózbekstan shekarasynda usaq kóterme jáne bólshek saýdanyń jańa formatyn engizýdi, halyqaralyq týrızmdi damytýdy, logıstıkalyq qyzmetterdi jetildirýdi jáne transshekaralyq iskerlik yntymaqtastyq ornatýdy kózdeıdi», - dedi vıtse-mınıstr.

Qaırat Tórebaevtyń aıtýyna qaraǵanda, joba aıasynda 10 myń jumys oryny ashylady. Al saýda ortalyǵy tolyqqandy paıdaǵa jaraǵan ýaqytta jumyspen qamtylǵandardyń sany 40 myń orynǵa deıin ósýi múmkin.

Eske sala ketsek, buǵan deıin Qaırat Tórebaev Eýrazııalyq ekonomıkalyq odaq aıasynda Reseı naryǵyna engen otandyq kompanııalar betpe-bet kelgen problemalaryn aıtqysy kele bermeıtinin málim etken edi.