Qazaqstan men Ózbekstan Qorǵanys mınıstrleri Aqtaýda kezdesti

AQTAÝ. QazAqparat – Eki eldiń Qorǵanys mınıstrleri general-polkovnık Rýslan Jaqsylyqov pen general-leıtenant Bahodır Qurbanov «Qanjar-2023» birlesken jedel-taktıkalyq arnaıy oqý-jattyǵýynyń ekinshi kezeńi ótetin Aqtaý garnızonynyń áskerı nysandarynda boldy, dep habarlaıdy QazAqparat mınıstrliktiń baspasóz qyzmetine silteme jasap.

Taraptar jaýyngerlik daıyndyq, áskerı bilim berý jáne áskerı-patrıottyq tárbıe salasyndaǵy ekijaqty qatynastardyń aǵymdaǵy jaı-kúıi men perspektıvalaryn talqylady.

Sonymen qatar olar oqý-jattyǵýlardaǵy oqý-jaýyngerlik mindetterdi birlesip oryndaý shtabtar men bólimsheler is-qımyldarynyń jedeldigi men úılesimdiligine qol jetkizýge, urys júrgizýdiń jańa nysandary men ádisterin ıgerýge múmkindik beretinin atap ótti.

Budan ózge eki eldiń qorǵanys mınıstrleri áskerı bilim berý salasyndaǵy yntymaqtastyqtyń áleýetin de toqtaldy.

General-polkovnık Rýslan Jaqsylyqov áriptesine Ózbekstan Qarýly kúshteri áskerı orkestriniń «Astana – mádenıet kerýeni» halyqaralyq áskerı-mýzykalyq festıvaline jáne «Vatan taııanchı» qozǵalysy ókilderiniń «Aıbyn-2023» áskerı-patrıottyq jastar jıynyna qatysqany úshin alǵys bildirdi.

Kezdesý sońynda qorǵanys vedomstvolarynyń basshylary qol jetkizilgen ýaǵdalastyqtardyń josparly iske asyrylýyn atap ótip, ózara tıimdi yntymaqtastyqty damytý men nyǵaıtýǵa senim bildirdi.