Qazaqstan men Ózbekstan energetıka salasynda yntymaqtastyqty nyǵaıtýda
«Eki el sońǵy jyldary munaı men gaz salasynda aıtarlyqtaı áleýetti damytty. Búginde munaı-gaz jetkizý sektoryndaǵy ózara is-qımyl jolǵa qoıyldy. Memleket basshysynyń 2017 jylǵy 16 qyrkúıekte Ózbekstanǵa jasaǵan resmı sapary barysynda eki el úkimetteri arasynda energetıka salasy boıynsha negizdemelik kelisimge qol qoıyldy. Osy kelisim negizinde eki el arasyndaǵy munaı-gaz, munaı-gaz-hımııasy jáne elektr energetıkasy salasyndaǵy yntymaqtastyq damytylady. Kórshi memleketterdiń yntymaǵy artýy úshin geografııalyq jaǵdaılar da eskerildi», - dedi Energetıka mınıstriniń mindetin atqarýshy Mahambet Dosmuhambetov.
Onyń sózine qaraǵanda, atalǵan kelisimdi ratıfıkatsııalaý biraz máseleni sheshýge múmkindik beredi. Munaı eksportyn ulǵaıtý úshin Ózbekstanǵa shıki munaı jetkizý, kúzgi-qysqy kezeńde Qazaqstannyń ońtústigin tabıǵı gazben úzdiksiz qamtý máselesi sheshiledi.
Búginde Ózbekstannyń munaıǵa degen qajettiligin qamtamasyz etý úshin 2018 jyly 260 myń tonnadan astam Qazaqstan munaıy jetkizildi.
«Qazaqstan aldaǵy ýaqytta da Ózbekstanǵa óz resýrstarynan munaı jetkizýge daıyn. Shaǵyr stansasyndaǵy temirjol tsısternalaryna aýystyryp tıeý arqyly «Keńqııaq-Qumkól» munaı qubyry boıynsha jetkiziledi. Qazirgi ýaqytta osy baǵyttaǵy tarıf bir tonna úshin shamamen 25 AQSh dollaryn quraıdy», - dedi ol.
Belgili bolǵandaı, RF tarapy ózbek jaǵynyń suraýyna sáıkes, Ózbekstanǵa jylyna 1 mln tonnaǵa deıin munaı jetkizý máselesin qarastyrýda. Bul rette Qazaqstan eki el arasynda tranzıttik tarap retinde qaralady.
«Jalpy aıtqanda, Ózbekstan jylyna 5 mln tonnaǵa deıin munaı satyp alýdy josparlaýda. Sonyń ishinde Qazaqstannan 2 mln, al Reseıden 3 mln tonna satyp alýǵa múddeli. Ózbekstanǵa 5 mln tonnaǵa deıin munaıdy turaqty jetkizý úshin kólik ınfraqurylymyna birshama ınvestıtsııa qajet», - dedi Mahambet Dosmuhambetov.