Qazaqstan men Ózbekstan birlesken saýda kompanııasyn qurdy
Eksporttyq-ımporttyq kásiporynnyń quryltaıshylary «QazTrade» saýda saıasatyn damytý ortalyǵy» AQ jáne «ÝzTreıd» AQ boldy.
Qazaqstan men Ózbekstan memleketteri basshylarynyń ýaǵdalastyqtaryn damytý úshin elderimiz arasynda logıstıkalyq marshrýttardy, sondaı-aq eksporttyq-ımporttyq operatsııalarǵa arnalǵan qyzmetterdi keńeıtý jónindegi jobalar belsendi túrde iske asyrylýda. Ózara saýdany ulǵaıtý — eki tarap ta júzege asyrýǵa múddeli birinshi kezektegi mindetterdiń biri.
Syrtqy saýda kompanııasynyń qyzmeti eki eldiń iri kásiporyndarynyń ónimderine naryqtyq zertteýler men básekelestik taldaý júrgizýge, daıyn ónimdi óndirýge tapsyrystardy ornalastyrý, ózara saýda protsesterin ońtaılandyrý jáne úılestirý jóninde usynystar ázirleýge, bıznesti sertıfıkattaýǵa jáne ónimdi eksporttaýǵa ilgeriletýge, sondaı-aq olardyń tapsyrystary boıynsha tehnologııalyq jabdyqtardy, qosalqy bólshekterdi, jıyntyqtaýyshtardy jetkizýge járdemdesýge, Ózbekstan men Qazaqstanda úshinshi elderden ımportty almastyrý úshin óndirilgen shıkizat pen materıaldar, jańa satyp alýshylar men tutynýshylardy izdeýge baǵyttalatyn bolady.
«QazTrade» AQ Bas dırektory Nuraly Bókeıhanov atap ótkendeı, birlesken kompanııa qurý qazaqstandyq kásiporyndarǵa eki eldiń naryqtaryna taýarlardy jetkizý kólemin ulǵaıtýǵa múmkindik beredi, ózara saýdadaǵy shekteýler men kedergilerdi alyp tastaý boıynsha usynystar ázirleýge járdemdesetin bolady.
«Bastapqy kezeńde bizdiń ishki naryqtyń qajettilikterin qamtamasyz etý úshin Ózbekstannan jemis-kókónis ónimderin satyp alý josparlanýda. Budan basqa, Aýǵanstanǵa odan ári eksporttaý múmkindigimen Ózbekstan aýmaǵynda qazaqstandyq un tartý ónimderin satýǵa kómektesetin bolamyz. Biz ózbek tarapymen logıstıkalyq shyǵystarǵa preferentsııalar berý týraly ýaǵdalastyq», - dedi Saýda saıasatyn damytý ortalyǵynyń basshysy.
Budan basqa, jobany iske asyrý qazaqstandyq naryqtyń úshinshi elderden keletin ımportqa táýeldiligin qysqartý jónindegi memlekettik sharalardyń tıimdiligin arttyrýǵa yqpal etetin bolady.
2022 jyldyń qorytyndysy boıynsha Qazaqstan men Ózbekstan arasyndaǵy taýar aınalymy 5,0 mlrd dollarǵa jetti, bul ótken jylǵy kórsetkishten 29,8%-ǵa joǵary (3,8 mlrd dollar). Qazaqstandyq taýarlardy eksporttyq jetkizý kólemi 33%-ǵa ósip, 3,7 mlrd dollardy qurady. Eksporttyń ósýi negizinen kendi jáne mys kontsentrattaryn (ósimi 4,8 ese), bıdaıdy (32,3%-ǵa), jeńil avtomobılderdi (83,7%-ǵa), kúnbaǵys maıyn (97,2%-ǵa), jańa jáne salqyndatylǵan sıyr gov (ósimi 4,1 ese), óńdelmegen alıýmınııdi (70,4%-ǵa) jetkizýdiń ulǵaıýyna baılanysty boldy).