Qazaqstan men Ózbekstan birlesken áskerı oqý-jattyǵý ótkizdi
Qazaqstan Qorǵanys mınıstriniń Ózbekstanǵa resmı sapary aıasynda eki el qorǵanys vedomstvolarynyń basshylary general-leıtenant Murat Bektanov pen general-leıtenant Bahodır Qurbanov «Termez» polıgonynda «Hamkorlik-2021» birlesken oqý-jattyǵýynyń belsendi kezeńin baqylady.
Oqý-jattyǵýdyń jospary boıynsha jaýyngerlik bólimsheler izdeý-barlaý is-qımyldaryn júrgizý, qarsylastyń tutqıyldan jasaǵan shabýylynyń aldyn alý, jaýdyń myqty jasaqtarynyń kózin qurtý, shabýylǵa toıtarys bere otyryp, joǵary mobıldi áskerılendirilgen toptardy joıý tapsyrmalaryn oryndady.
«Hamkorlik-2021» birlesken oqý-jattyǵýy eki eldiń áskerı quramalarynyń óńirdegi jaǵdaıdyń ýshyǵý qaýpi artqan kezde túrli oqý-jaýyngerlik mindetterdi sheshýdegi ózara is-qımyl deńgeıin, sondaı-aq baılanys pen úılesimdilik dárejesin arttyrýǵa baǵyttalǵan.
Murat Bektanov pen Bahodır Qurbanovtyń resmı kelissózderi barysynda óńirlik jáne jahandyq qaýipsizdiktiń sońǵy ýaqyttaǵy syn-tegeýrinderi men qaýip-qaterleri talqylanatyn taqyrypqa aınaldy. Onyń ishinde Aýǵanstandaǵy ahýal da bar. Odan bólek, taraptar Qazaqstan men Ózbekstannyń qorǵanys salasyndaǵy ózara qarym-qatynastarynyń ózekti baǵyttaryn, áskerı bilim berý jáne kadrlar daıarlaý máselelerin de qarastyrdy.
Kelissózder nátıjesinde eki eldiń qorǵanys vedomstvolary arasyndaǵy 2022 jylǵa arnalǵan yntymaqtastyq jospary bekitildi. Josparda jedel jáne jaýyngerlik daıarlyqtyń birlesken is-sharalary, komandalardyń Qazaqstan men Ózbekstan aýmaǵynda Armııa halyqaralyq oıyndaryna qatysýy, ózara tájirıbe almasý saparlary qamtyldy.