Qazaqstan men Ózbekstan basshylary bir-birin dıplomatııalyq qatynastardyń mereıtoıymen quttyqtady

TAShKENT. QazAqparat - Qazaqstan Respýblıkasy men Ózbekstan Respýblıkasynyń arasyndaǵy dıplomatııalyq qarym-qatynastar ornatylǵanyna 25 jyl tolýyna oraı eki memlekettiń basshylary bir-birine quttyqtaý joldady, dep habarlaıdy «QazAqparat» HAA-nyń menshikti tilshisi ÓR SІM resmı saıtyna silteme jasap.

Qazaqstan Respýblıkasynyń Prezıdenti Nursultan Nazarbaevtyń joldaýynda eki el arasyndaǵy yntymaqtastyqtyń tarıhı turǵydan alǵandaǵy qysqa kezeńinde aıtarlyqtaı jetistikterge qol jetkizilgeni aıtylady. «Búgingi tańda Qazaqstan men Ózbekstan saıası, saýda-ekonomıkalyq jáne mádenı-gýmanıtarlyq salalarda ekijaqty jáne kópjaqty yntymaqtastyqtyń úlgili modelin kórsetip, búkil Ortalyq Azııa óńiriniń odan ári damýyna kepildik beretin berik negizdi qalyptastyrýda. Aǵymdaǵy jyly Sizdiń Astanaǵa jasaǵan saparyńyz jáne meniń Tashkentke jasaǵan saparym elderimiz arasyndaǵy yntymaqtastyqty tereńdetýge eleýli úles qosty. Olardyń qorytyndylary bizdiń qarym-qatynastarymyzdyń kókjıegin aıtarlyqtaı keńeıtip, bizdiń kún tártibimizdegi jańa basymdyqtardy belgilep berdi», - delingen Elbasynyń quttyqtaýynda.

Nursultan Nazarbaev «Qazaqstan men Ózbekstan arasyndaǵy tabysty strategııalyq áriptestik aldaǵy ýaqytta jáne bolashaqta ǵasyrlar boıy dostyq pen kelisim negizinde ómir súrip kele jatqan halyqtarymyzdyń ıgiligi jolynda qarqynmen damıtynyna» nyq senim bildirdi.

Ózbekstan Prezıdenti Shavkat Mırzıeevtiń dıplomatııalyq qarym-qatynastar ornatylǵanyna 25 jyl tolýyna oraı joldaǵan quttyqtaýynda «osynaý tarıhı mańyzdy oqıǵa Máńgilik dostyq jáne Strategııalyq áriptestik týraly kelisimderdiń erejeleri negizinde elderimiz arasyndaǵy dostyq pen tatý kórshilikti nyǵaıtýǵa, ózara tıimdi ári kópjosparly yntymaqtastyqty qarqynmen damytýǵa berik irgetas qalaǵany» aıtylady. «Bıyl joǵary deńgeıde ótken tabysty kezdesýler men kelissózder ózbek-qazaqstandyq qarym-qatynastardy túbegeıli jańa sapalyq deńgeıge shyǵarýǵa múmkindik berdi, naqty is júzindik mazmunmen tolyqtyrdy. Sátti ári tabysty yntymaqtastyqtyń qol jetkizilgen qazirgi deńgeıi Ózbekstan jáne Qazaqstan baýyrlas halyqtarynyń múddelerine jáne Ortalyq Azııa óńirindegi turaqtylyq pen órkendeýdi qamtamasyz etýge tolyq sáıkes keledi», - delingen qujatta.

Ózbekstan basshysy «ózara yntymaqtastyqty aldaǵy ýaqytta da barlyq jaǵynan, sonyń ishinde halyqaralyq jáne óńirlik uıymdar aıasynda belsendi túrde keńeıtý jáne tereńdetýge» nıetti ekenin bildirdi. Onyń aıtýynsha, «Bul, shúbásiz, elderimiz ben halyqtarymyzdyń arasyndaǵy dostyqty, tatý kórshilikti jáne áriptestikti dáıektilikpen nyǵaıtýǵa jaǵdaı jasaıdy».