Qazaqstan men Ózbekstan basshylary adal nıetti shyn dostar edi - konferentsııa

TAShKENT. QazAqparat - «Qazaqstan-Ózbekstan: ótken jyldar, búgin men bolashaq» atty konferentsııa barysynda Ózbekstannyń Syrtqy ister mınıstriniń orynbasary Bahtıer Islamov Nursultan Nazarbaev pen Islam Kárimovtyń qarym-qatynastaryna qatysty estelikterimen bólisti, dep habarlaıdy QazAqparat tilshisi.

Atalmysh jıyn Qazaqstan men Ózbekstan arasyndaǵy dıplomatııalyq qarym-qatynastardyń ornaǵanyna 25 jyl tolýyna oraı uıymdastyryldy.

«Men Nursultan Nazarbaev pen Islam Kárimovtyń kóptegen kezdesýleriniń kýási boldym. Bul kisiler bir-birine adal nıetti shyn dostar bolatyn. Olar bir-birin qatty syılady. Islam Kárimov Nursultan Nazarbaevtyń ózi bolmaǵan jıyndarda  Qazaqstannyń dos memleket ekenin jáne ony Nursultan Nazarbaev basqaratynyn aıtyp otyratyn»,-dedi Bahtıer Islamov.

«Kezekti saparlarynyń birinde Islam Kárimov tipti «joldasyń qazaq bolsa, jolyńnan adaspaısyń» dep te aıtty. Islam Kárimov bul sózdi shyn kóńilmen jetkizdi. Al teginde Islam Ábdiǵanıulynyń mundaı sózderdi jıi aıta bermeıtinin barshaǵa aıan. Sondyqtan men joldasyń qazaq bolsa, kún saıyn qubylyp turatyn álemde tek jol taýyp qana qoımaısyń degendi aıtqym kelip otyr. Buǵan eki el prezıdenttteriniń kezdesýi jarqyn dálel»,-dedi mınıstrdiń orynbasary.